ടിക്കറ്റ്​ വിലവർധന ഇതരസംസ്ഥാന ലോട്ടറി മാഫിയയെ സഹായിക്കാൻ -ഐ.എൻ.ടി.യു.സി

കോട്ടയം: കേരള ഭാഗ്യക്കുറി ടിക്കറ്റിന്‍റെ വില 40 രൂപയിൽനിന്ന് അമ്പതാക്കി വർധിപ്പിക്കാനുള്ള സർക്കാർ തീരുമാനത്തിനെതിരെ ഓൾ കേരള ലോട്ടറി ഏജന്‍റ്​ ആൻഡ്​ സെല്ലേഴ്സ് കോൺഗ്രസ് ഐ.എൻ.ടി.യു.സി ലോട്ടറി ഓഫിസുകൾക്ക് മുന്നിൽ സമരം നടത്തി. ഇതര സംസ്ഥാന ലോട്ടറി മാഫിയയും ലോട്ടറി വകുപ്പിലെ ഉന്നതരും ചേർന്ന് നടത്തിയ ഗൂഢാലോചനയാണ് വിലവർധനക്ക്​ പിന്നിലെന്ന് സമരത്തിന്‍റെ സംസ്ഥാനതല ഉദ്ഘാടനം നിർവഹിച്ച് യൂനിയൻ സംസ്ഥാന പ്രസിഡന്‍റ്​ ഫിലിപ്പ് ജോസഫ് പറഞ്ഞു. പാവപ്പെട്ട വിൽപന തൊഴിലാളികളെ ആത്മഹത്യയിലേക്ക് തള്ളിവിടുന്ന എൽ.ഡി.എഫ് സർക്കാർ തീരുമാനത്തിനെതിരെ ലോട്ടറി ബന്ദ് ഉൾപ്പെടെയുള്ള സമരങ്ങൾ ആരംഭിക്കുമെന്നും യൂനിയൻ പ്രസിഡന്‍റ്​ പറഞ്ഞു. യൂനിയൻ ജില്ല പ്രസിഡന്‍റ്​ കെ.ആർ. സജീവൻ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ്​ നന്തിയോട് ബഷീർ, സംസ്ഥാന ഭാരവാഹികളായ അയ്മനം രവീന്ദ്രൻ, കെ.എ. മുഹമ്മദ് ബഷീർ, ബെന്നി ജോസഫ്, ജില്ല ഭാരവാഹികളായ വി.ജി. അംബിക, കെ.ജി. ശശി, പി.വി. മത്തായി, പി.എം. പൈലി, കെ.ഇ. ഷാജി തുടങ്ങിയവർ സംസാരിച്ചു.