ഹനുമാൻകുന്ന്-ചാരംകുഴി റോഡ് സഞ്ചാരയോഗ്യമാക്കണം

മല്ലപ്പള്ളി: ആനിക്കാട് പഞ്ചായത്തിലെ ഹനുമാൻകുന്ന്-ചാരംകുഴി റോഡ് സഞ്ചാരയോഗ്യമാക്കണമെന്ന് ആവശ്യം. മാസങ്ങളായി തകർന്നുകിടക്കുന്ന റോഡിലെ ടാറിങ് പൂർണമായും ഇളകി കുഴികൾ രൂപപ്പെട്ടു. കാൽനട പോലും ദുസ്സഹമായി. മെറ്റൽ ഇളകി ചിതറിക്കിടക്കുന്നതിനാൽ ഇരുചക്ര വാഹനയാത്രക്കാർ അപകടത്തിൽപെടുന്നതും വാഹനങ്ങൾക്ക് കേടുപാടുകൾ സംഭവിക്കുന്നതും പതിവാണ്. മല്ലപ്പള്ളി-നീലമ്പാറ, പാതിക്കാട്-കവളിമാവ് റോഡുകളെ ബന്ധിപ്പിക്കുന്ന പാതയാണ് ശോച്യാവസ്ഥയിലായിരിക്കുന്നത്. റോഡിന്റെ വശങ്ങളിൽ ഓടയില്ലാത്തതിനാൽ മഴക്കാലത്ത് റോഡിലൂടെ വെള്ളം ഒഴുകിയതാണ് തകർച്ചക്ക് കാരണം. റോഡ് റീ ടാറിങ് നടത്തി ഗതാഗത യോഗ്യമാക്കണമെന്ന്​ നാട്ടുകാർ ആവശ്യപ്പെട്ടു.