അബാന്‍ ജങ്​ഷന്‍ മേല്‍പാലം നിര്‍മാണ ഉദ്ഘാടനം ഇന്ന്

പത്തനംതിട്ട: ജില്ലക്ക് ഇന്ന്​ റോഡ്​ വികസന പദ്ധതികളുടെ ഉദ്​ഘാടന ദിനം. നാളുകളായി മുറവിളി ഉയരുന്ന പദ്ധതികൾക്കാണ്​​ തുടക്കംകുറിക്കുന്നത്​. കേരള റോഡ് ഫണ്ട് ബോര്‍ഡി​ൻെറ ചുമതലയില്‍ കിഫ്ബിയില്‍നിന്ന്​ 46.80 കോടി രൂപ ചെലവില്‍ നിര്‍മിക്കുന്ന പത്തനംതിട്ട അബാന്‍ ജങ്​ഷന്‍ മേല്‍പാലത്തി​ൻെറ നിര്‍മാണ ഉദ്ഘാടനമാണ്​ പ്രധാനം. തിങ്കളാഴ്​ച ഉച്ചക്ക് 12ന് പത്തനംതിട്ട നഗരസഭ ബസ് സ്​റ്റാന്‍ഡ് ഓപണ്‍ സ്​റ്റേജിൽ മന്ത്രി മുഹമ്മദ് റിയാസ് ഉദ്​ഘാടനം ചെയ്യും. മന്ത്രി വീണാ ജോര്‍ജ് അധ്യക്ഷതവഹിക്കും. കൈപ്പട്ടൂര്‍ വള്ളിക്കോട് റോഡ്, മുറിഞ്ഞകല്‍ അതിരുങ്കല്‍ പുന്നമൂട് കൂടല്‍ രാജഗിരി റോഡ്, തണ്ണിത്തോട് തേക്കുതോട് പ്ലാ​േൻറഷന്‍-കരിമാന്‍തോട് റോഡ്, അട്ടക്കുളം പാലം​ എന്നിവയുടെ നിർമാണ ഉദ്​ഘാടനവും തിങ്കളാഴ്​ച അതതിടങ്ങളിൽ നടക്കുന്ന ചടങ്ങുകളിൽ മന്ത്രി മുഹമ്മദ് റിയാസ് നിർവഹിക്കും. ദീര്‍ഘനാളായി തകര്‍ന്ന കൈപ്പട്ടൂര്‍ വള്ളിക്കോട് റോഡിന്​ കഴിഞ്ഞ ബജറ്റില്‍ ആറുകോടി വകയിരുത്തിയിരുന്നു. എട്ടു മാസം ആണ് നിര്‍മാണ കാലാവധി. കിഴക്കന്‍ മലയോര മേഖലയിലെ പ്രധാന റോഡായ മുറിഞ്ഞകല്ലില്‍നിന്ന്​ അതിരുങ്കല്‍ പുന്നമൂട് എത്തി കൂടല്‍ രാജഗിരി വഴി കലഞ്ഞൂര്‍ പാടം റോഡില്‍ എത്തുന്ന 15 കിലോമീറ്റര്‍ 15 കോടി വിനിയോഗിച്ചാണ് നിര്‍മിക്കുന്നത്. ഇരുതോട് പാലം, കാരക്കക്കുഴി പാലം തുടങ്ങിയവ പുനര്‍നിര്‍മിക്കും. 6.76 കോടി വിനിയോഗിച്ചാണ്​ തണ്ണിത്തോട്മൂഴി തേക്ക്‌തോട് പ്ലാ​േൻറഷന്‍ കരിമാന്‍ തോട് റോഡ് നിര്‍മിക്കുന്നത്​. എട്ടുമാസമാണ് നിര്‍മാണ കാലാവധി. മല്ലപ്പള്ളി-ആനിക്കാട് പഞ്ചായത്തിലെ പുനര്‍നിര്‍മിക്കുന്ന അട്ടക്കുളം പാലത്തി​ൻെറ നിര്‍മാണ ഉദ്​ഘാടനവും നടക്കും.