'വഖഫ്​ ബോർഡ് നിയമനം: മതപണ്ഡിതരുമായി ചർച്ചക്ക് തയാറാകണം'

പന്തളം: വഖഫ്​ ഒരു ഇസ്​ലാമിക മതകാര്യമാണെന്നും മതം അനുശാസിക്കുന്ന പരിഷ്കരണങ്ങൾ മാത്രമാണ് വഖഫ് കൈകാര്യം ചെയ്യുന്ന ബോർഡിലും വരുത്തേണ്ടതെന്നും ജംഇയ്യതുൽഉലമ എ ഹിന്ദ് നേതാക്കൾ പറഞ്ഞു. മതനിയമങ്ങളിൽ അവഗാഹമുള്ള മതപണ്ഡിതരാണ് ഈ വിഷയത്തിൽ ആധികാരിക തീരുമാനം പറയേണ്ടത്. വഖഫ് ബോർഡ് നിയമനം പി.എസ്.സിക്ക് വിടാനുള്ള പുതിയ തീരുമാനത്തിൽ മതനേതൃത്വത്തിന് ആശങ്കയുണ്ടെങ്കിൽ സർക്കാർ മതപണ്ഡിതരുമായി ചർച്ച ചെയ്ത് സമവായത്തിൽ എത്തണം. അല്ലങ്കിൽ തൽസ്ഥിതി തുടരലാണ് കേരളത്തി​ൻെറ മതേതര സർക്കാറിന് ഉചിതമെന്നും ജംഇയ്യതുൽഉലമ എ ഹിന്ദ് ജില്ല കമ്മിറ്റി പറഞ്ഞു. ഈ കാര്യം ജംഇയ്യത്​ സംസ്ഥാന നേതൃതം സർക്കാറി​ൻെറ ശ്രദ്ധയിൽപെടുത്തിയിട്ടുണ്ട്. പക്വമായ തീരുമാനം ഉണ്ടാകുമെന്ന് പ്രതീക്ഷിക്കുന്നതായി ജില്ല പ്രസിഡൻറ്​ മൗലാന ജമാലുദ്ദീൻ കൗസരി, ജനറൽ സെക്രട്ടറി ഹാഫിസ് ഹാഷിം ഹസനി, ട്രഷറർ ഷുഐബ് ഹാജി എന്നിവർ പറഞ്ഞു.