എഴുമറ്റൂർ-പടുതോട് റോഡിൽ ദുരിതയാത്ര

മല്ലപ്പള്ളി: എഴുമറ്റൂർ-പടുതോട് ബാസ്​റ്റോ റോഡ് ഒന്നിലൂടെയുള്ള വാഹനയാത്ര ദുരിതമാകുന്നു. എഴുമറ്റൂർ മുതൽ പടുതോടുവരെ റോഡിലെ ടാറിങ് ഇളകി കുഴികളായിട്ട് നാളുകൾ ഏറെയായി. ചില സ്ഥലങ്ങളിൽ വലിയ ഗർത്തങ്ങളാണ് രൂപപ്പെട്ടിരിക്കുന്നത്. അമിതഭാരം കയറ്റിയ നൂറുകണക്കിന് ടിപ്പറുകളാണ് രാപകൽ ഇതുവഴി കടന്നുപോകുന്നത്. റോഡി​ൻെറ തകർച്ചക്ക് പ്രധാന കാരണം ഇതാണെന്നാണ് നാട്ടുകാർ പറയുന്നത്. മറ്റ് റോഡുകൾ എല്ലാം ഉന്നത നിലവാരത്തിൽ പണിയുമ്പോൾ എഴുമറ്റൂർ-പടുതോട് ബാസ്​റ്റോ റോഡിനെ പരിഗണിക്കുന്നില്ലെന്നും ആക്ഷേപം ഉയർന്നിട്ടുണ്ട്. ഇവിടെ അറ്റകുറ്റപ്പണികൾപോലും നടക്കുന്നില്ലെന്നാണ് നാട്ടുകാരുടെ പരാതി. നിരവധി സമരങ്ങൾക്കും വഴിതടയലിനുംശേഷമാണ് വല്ലപ്പോഴും അറ്റകുറ്റപ്പണികൾക്കുപോലും ബന്ധപ്പെട്ടവർ തയാറാകുന്നത്.