വളര്‍ത്തുമൃഗങ്ങൾ നഷ്​ടപ്പെട്ടവർക്ക് നഷ്​ടപരിഹാരം -മന്ത്രി ചിഞ്ചുറാണി

പത്തനംതിട്ട: വെള്ളപ്പൊക്കക്കെടുതിയില്‍ വളര്‍ത്തുമൃഗങ്ങളെ നഷ്​ടമായവര്‍ക്ക് മതിയായ നഷ്​ടപരിഹാരം നല്‍കുമെന്ന് മന്ത്രി ജെ. ചിഞ്ചുറാണി പറഞ്ഞു. ജില്ലയിലെ വെള്ളം പൊങ്ങിയ മേഖലകളിലെ ക്ഷീരസംഘങ്ങളില്‍ സന്ദര്‍ശനം നടത്തിയതിനുശേഷം സംസാരിക്കുകയായിരുന്നു മന്ത്രി. സംസ്ഥാനത്ത് സ്വന്തമായി കാലിത്തീറ്റ നിര്‍മാണം ആരംഭിക്കാൻ നടപടി സ്വീകരിച്ചുവരുകയാണ്. ദുരിതബാധിത പ്രദേശത്തെ കന്നുകാലികള്‍ക്കുള്ള കുളമ്പുരോഗ വാക്‌സിന്‍ കുത്തി​വെപ്പ്​ വേഗത്തില്‍ പൂര്‍ത്തിയാക്കാന്‍ മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കി. വായ്പൂര് ചെറുതോട്ട് കാലായില്‍ ക്ഷീരസംഘം, സമീപത്തെ മാവേലി സ്​റ്റോര്‍, വള്ളംകുളം ക്ഷീരസംഘം, പന്തളം കടക്കാട് ഫാമിലെ ഉരുക്കളെ പുനരധിവസിപ്പിച്ച പന്തളം എന്‍.എസ്.എസ് കോളജ് എന്നിവിടങ്ങളില്‍ മന്ത്രി സന്ദര്‍ശിച്ചു. ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍, പ്രമോദ് നാരായണ്‍ എം.എല്‍.എ, കലക്ടര്‍ ഡോ. ദിവ്യ എസ്. അയ്യര്‍, ജില്ല പഞ്ചായത്ത് വൈസ് പ്രസിഡൻറ്​ രാജി പി. രാജപ്പന്‍, മല്ലപ്പള്ളി ബ്ലോക്ക് പഞ്ചായത്ത് പ്രസിഡൻറ്​ ബിന്ദു ചന്ദ്രമോഹന്‍, കോട്ടാങ്ങല്‍ പഞ്ചായത്ത് പ്രസിഡൻറ്​ ബിനു ജോസഫ്, ഇരവിപേരൂര്‍ പഞ്ചായത്ത് പ്രസിഡൻറ്​ ശശിധരന്‍പിള്ള, മില്‍മ ചെയര്‍മാന്‍ എന്‍. ഭാസുരാംഗന്‍, ക്ഷീരവികസന വകുപ്പ് ഡെപ്യൂട്ടി ഡയറക്ടര്‍ ആര്‍. സിന്ധു, സി.പി.ഐ ജില്ല സെക്രട്ടറി എ.പി. ജയന്‍ തുടങ്ങിയവര്‍ ഒപ്പമുണ്ടായിരുന്നു. -------- ചിത്രം PTL 16 CHINCHU വെള്ളപ്പൊക്കത്തെ തുടര്‍ന്ന് കടക്കാട് ഫാമിലെ ഉരുക്കളെ പുനരധിവസിപ്പിച്ച പന്തളം എന്‍.എസ്.എസ് കോളജില്‍ മന്ത്രി ജെ. ചിഞ്ചുറാണി സന്ദര്‍ശിച്ചപ്പോൾ