കോവിഡ് ബാധിച്ച്​ മരിച്ച വിമുക്ത ഭടന്മാരുടെ പേരുവിവരങ്ങള്‍ നല്‍കണം

പത്തനംതിട്ട: ജില്ലയില്‍ കോവിഡ് ബാധിച്ച്​ മരിച്ച ആര്‍മി, നേവി, എയര്‍ഫോഴ്സ് എന്നീ സേനാവിഭാഗങ്ങളില്‍നിന്ന്​ വിരമിച്ചവരുടെ പേരുവിവരങ്ങള്‍ മരണസാക്ഷ്യപത്രം, വിമുക്തഭട തിരിച്ചറിയല്‍ കാര്‍ഡ്, ആധാര്‍ കാര്‍ഡ് എന്നീ രേഖകളുടെ പകര്‍പ്പ് സഹിതം ജില്ല സൈനികക്ഷേമ ഓഫിസില്‍ എത്രയും വേഗം അറിയിക്കണം. ഫോൺ: 0468 2961104. ഡക്ക് ട്രെയിനിങ് ഇൻസ്​റ്റിറ്റ്യൂട്ടിൽ പച്ചത്തുരുത്ത് തിരുവല്ല: നഗരസഭ പരിധിയിലെ മൃഗസംരക്ഷണവകുപ്പ് ഡക്ക് ട്രെയിനിങ് ഇൻസ്​റ്റിറ്റ്യൂട്ട് ആന്‍ഡ് ഹാച്ചറിയിലെ പുതിയ പച്ചത്തുരുത്ത് തിരുവല്ല നഗരസഭ ചെയര്‍പേഴ്‌സൻ ബിന്ദു ജയകുമാര്‍ തൈനട്ട് ഉദ്ഘാടനം ചെയ്തു. നഗരസഭ ക്ഷേമകാര്യ സ്​റ്റാന്‍ഡിങ് കമ്മിറ്റി ചെയര്‍മാന്‍ ജിജി വട്ടശ്ശേരില്‍, വാര്‍ഡ് കൗണ്‍സിലര്‍ ജാസ് പോത്തന്‍, സെക്​ഷന്‍ ഫോറസ്​റ്റ്​ ഓഫിസര്‍ പി.എ. ആരിഫ്, ഡോ. രമ്യ കെ.വാസു, തൊഴിലുറപ്പ് എ.ഇ. അഭിജിത്, ഹരിതകേരളം മിഷന്‍ ആര്‍.പി മാരായ എസ്.വി. സുബിന്‍, ശരണ്യ എസ്.മോഹന്‍, ഹാച്ചറി ജീവനക്കാര്‍, തൊഴിലുറപ്പ് അംഗങ്ങള്‍ എന്നിവര്‍ പങ്കെടുത്തു. സോഷ്യല്‍ ഫോറസ്​ട്രിയില്‍നിന്ന്​ 150 തൈകള്‍ നിലവില്‍ സ്ഥലത്ത് എത്തിച്ചിട്ടുണ്ട്. തൈകള്‍ നട്ട് ജൈവവേലിയും ബോര്‍ഡും ഉടന്‍ സ്ഥാപിക്കുമെന്ന് എ.ഇ അറിയിച്ചിട്ടുണ്ട്. 30 വാഹനങ്ങളുടെ ലേലം 16ന് പത്തനംതിട്ട: എക്‌സൈസ് ഡിവിഷ​ൻെറ പരിധിയില്‍ വരുന്ന എക്‌സൈസ്, പൊലീസ് സ്​റ്റേഷനുകളിലെ അബ്കാരി, എന്‍.ഡി.പി.എസ് കുറ്റകൃത്യങ്ങളില്‍ ഉള്‍പ്പെട്ടിട്ടുള്ള വിവിധയിനം വാഹനങ്ങള്‍ (സ്‌കൂട്ടര്‍-5 ബൈക്ക്-24, വാന്‍-1) ലേലം ചെയ്യുന്നു. ജൂലൈ 16ന് രാവിലെ 11ന് പത്തനംതിട്ട ഡിവിഷന്‍ ഓഫിസിന് സമീപത്തുള്ള അനന്ദ്ഭവന്‍ ഹോട്ടല്‍ കോണ്‍ഫറണ്‍സ് ഹാളില്‍ ഡെപ്യൂട്ടി എക്‌സൈസ് കമീഷണര്‍ പരസ്യമായി ലേലംചെയ്യും. ഫോണ്‍: 0468 2222873.