നഷ്​ടപരിഹാരം നൽകണം -കെ.യു. ജനീഷ്കുമാർ എം.എൽ.എ

കലഞ്ഞൂർ: കാറ്റിലും മഴയിലും കലഞ്ഞൂർ പഞ്ചായത്തിൽ ഉണ്ടായ നാശനഷ്​ടം വിലയിരുത്തി ഉടൻ നഷ്​ടപരിഹാരം നൽകാൻ നടപടി സ്വീകരിക്കണമെന്ന് അഡ്വ. കെ.യു. ജനീഷ് കുമാർ എം.എൽ.എ തഹസിൽദാർക്ക് നിർദേശം നൽകി. തുടർച്ചയായ രണ്ടാംദിവസവും എം.എൽ.എ പഞ്ചായത്തിൽ സന്ദർശനം നടത്തി പഞ്ചായത്തിൽ ഉടനീളം വലിയ നാശനഷ്​ടങ്ങളാണ് ഉണ്ടായത്. വൈദ്യുതി വകുപ്പിന് മാത്രം 25 ലക്ഷത്തിലധികം രൂപയുടെ നഷ്​ടമാണ് ഉണ്ടായത്. 100ൽ അധികം പോസ്​റ്റുകൾ തകർന്നു. വൈദ്യുതി പുനഃസ്ഥാപിക്കാൻ നൂറിലധികം ജീവനക്കാരെ രംഗത്തിറക്കിയതായി എം.എൽ.എ പറഞ്ഞു. വിവിധ പ്രദേശങ്ങളിൽനിന്നാണ് ഈ ജീവനക്കാരെ എത്തിച്ചിരിക്കുന്നത്. ഉടൻ വൈദ്യുതി വിതരണം ആരംഭിക്കാൻ കഴിയുമെന്നാണ് പ്രതീക്ഷിക്കുന്നതെന്നും എം.എൽ.എ പറഞ്ഞു. മരങ്ങൾ കടപുഴകി 50ൽ അധികം വീടുകൾക്ക് നാശനഷ്​ടം സംഭവിച്ചു. ചില വീടുകൾ പൂർണമായും തകർന്നു. ഇവർക്ക് താമസ സൗകര്യം ആവശ്യമെങ്കിൽ ഒരുക്കിനൽകണമെന്ന് എം.എൽ.എ റവന്യൂ അധികൃതർക്ക് നിർദേശം നൽകി. കൃഷിനാശം വിലയിരുത്താൻ കൃഷിവകുപ്പ് ഉദ്യോഗസ്ഥർക്കും നിർദേശം നൽകിയിട്ടുണ്ട്. കാർഷിക മേഖലയിലുണ്ടായ നഷ്​ടം പരിഹരിക്കുന്നതിനും നടപടി സ്വീകരിക്കുമെന്ന് എം.എൽ.എ പറഞ്ഞു. കലഞ്ഞൂർ പഞ്ചായത്തിലെ മഴക്കെടുതി സംബന്ധിച്ച് റവന്യൂ വകുപ്പ് പ്രിൻസിപ്പൽ സെക്രട്ടറിക്ക് എം.എൽ.എ കത്ത് നൽകി, ജനങ്ങൾക്ക് നഷ്​ടപരിഹാരം ലഭിക്കാനുള്ള തുടർ പ്രവർത്തനങ്ങൾ സമയബന്ധിതമായി തന്നെ നടത്തുമെന്നും എം.എൽ.എ പറഞ്ഞു.