കോട്ടാങ്ങൽ പഞ്ചായത്തിൽ പ്രസിഡൻറ്​, വൈസ് പ്രസിഡൻറ്​ തെരഞ്ഞെടുപ്പ് ഇന്ന്​

മല്ലപ്പള്ളി: കോട്ടാങ്ങൽ പഞ്ചായത്തിൽ പ്രസിഡൻറ്​, വൈസ് പ്രസിഡൻറ്​ തെരഞ്ഞെടുപ്പ് തിങ്കളാഴ്ച നടക്കും. രാവിലെ 11ന് പ്രസിഡൻറ്​ തെരഞ്ഞെടുപ്പും ഉച്ചക്ക് രണ്ടിന് വൈസ് പ്രസിഡൻറ്​ തെരഞ്ഞെടുപ്പുമാണ് നടക്കുന്നത്. 13 അംഗ പഞ്ചായത്തിൽ എൽ.ഡി.എഫിനും ബി.ജെ.പിക്കും അഞ്ച് അംഗങ്ങൾ വീതവും യു.ഡി.എഫിന് രണ്ടും എസ്.ഡി.പി.ഐക്ക് ഒരുസീറ്റുമാണ് ഉള്ളത്. എൽ.ഡി.എഫിലെ ബിനു ജോസഫും ജമീല ബീവിയും ബി.ജെ.പിയിലെ ദീപ്തി ദാമോദരനും സി.ആർ. വിജയമ്മയുമാണ് പ്രസിഡൻറ്​, വൈസ് പ്രസിഡൻറ്​ സ്ഥാനത്തേക്ക് മത്സരിക്കാൻ സാധ്യത. ഒരു മുന്നണിക്കും വ്യക്തമായ ഭൂരിപക്ഷമില്ലാത്തതിനാൽ യു.ഡി.എഫി​ൻെറയോ എസ്.ഡി.പി.ഐയുടെയോ പിന്തുണ ലഭിക്കുന്ന മുന്നണിക്കായിരിക്കും ഭരണം ലഭിക്കുക. എന്നാൽ, കഴിഞ്ഞതവണ നടന്ന തെരഞ്ഞെടുപ്പിൽ എൽ.ഡി.എഫിനെ എസ്​.ഡി.പി.ഐ പിന്തുണക്കുകയായിരുന്നു. ബിനു ജോസഫ് പ്രസിഡൻറും ജമീല ബീവി വൈസ് പ്രസിഡൻറുമായി തെരഞ്ഞെടുക്കപ്പെട്ടെങ്കിലും എസ്​.ഡി.പി.ഐ പിന്തുണയോടെ പഞ്ചായത്ത് ഭരണം വേണ്ടെന്ന നിലപാടിനെ തുടർന്ന് തെരഞ്ഞെടുക്കപ്പെട്ട അംഗങ്ങൾ രാജിവെക്കുകയായിരുന്നു. സ്​റ്റാൻഡിങ്​ കമ്മിറ്റി തെരഞ്ഞെടുപ്പിൽ വികസനകാര്യവും ആരോഗ്യ വിദ്യാഭ്യാസവും എൽ.ഡി.എഫിനും ക്ഷേമകാര്യം യു.ഡി.എഫിനുമാണ് ലഭിച്ചത്. വികസനകാര്യ സ്​റ്റാൻഡിങ്​ കമ്മിറ്റി ചെയർമാൻ കെ.ആർ. കരുണാകരനാണ് ഇപ്പോൾ ആക്ടിങ് പ്രസിഡൻറ്​.