ആചാരപരമായ വള്ളസദ്യ നടത്തും

പത്തനംതിട്ട: കോവിഡി​ൻെറ പശ്ചാത്തലത്തില്‍ ഭക്തജനങ്ങളെ പങ്കെടുപ്പിക്കാതെ ആചാരപരമായ വള്ളസദ്യ നടത്താൻ തീരുമാനം. സെപ്റ്റംബര്‍ 10ന് രാവിലെ 11ന് നടത്താനിരിക്കുന്ന അഷ്​ടമി രോഹിണി വള്ളസദ്യ തെരഞ്ഞെടുക്കപ്പെട്ട 50 പേരെ മാത്രം ഉള്‍പ്പെടുത്തി ചടങ്ങുകള്‍ പരിമിതപ്പെടുത്തി നടത്താന്‍ തീരുമാനിച്ചതായി വീണാ ജോർജ്​ എം.എൽ.എ അറിയിച്ചു. കോവിഡ് മാനദണ്ഡങ്ങള്‍ പാലിച്ച് ആറന്മുള വള്ളസദ്യ, തിരുവോണത്തോണി വരവേല്‍പ്പ്, ഉതൃട്ടാതി ജലോത്സവം, അഷ്​ടമി രോഹിണി വള്ളസദ്യ എന്നിവ ആചാരപരമായ ചടങ്ങുകള്‍ മാത്രമായി നടത്തുന്നത് സംബന്ധിച്ച വിഡിയോ കോൺഫറന്‍സില്‍ സംസാരിക്കുകയായിരുന്നു എം.എല്‍.എ. ചടങ്ങുകളില്‍ പങ്കെടുക്കുന്നവര്‍ക്ക് കോവിഡ് പരിശോധന നടത്തുന്നത് സംബന്ധിച്ചും പൊലീസ്, അഗ്‌നിശമനസേന, ആരോഗ്യവകുപ്പ് തുടങ്ങിയ വിഭാഗത്തി​ൻെറ സാന്നിധ്യം സംബന്ധിച്ചും യോഗം ചര്‍ച്ച ചെയ്തു. 15ന് തിരുവോണത്തോണി വരവേല്‍പ് സംബന്ധിച്ചും ആറന്മുള ഉതൃട്ടാതി ജലോത്സവം സംബന്ധിച്ചും തീരുമാനമെടുക്കുന്നതിന്​ കലക്ടറുടെ അധ്യക്ഷതയില്‍ ജില്ല പൊലീസ് മേധാവി, ഡി.എം.ഒ എന്നിവരുടെ സാന്നിധ്യത്തില്‍ യോഗം ചേരും. ജില്ല പഞ്ചായത്ത് പ്രസിഡൻറ്​ അന്നപൂര്‍ണാദേവി, ഇലന്തൂര്‍ ബ്ലോക്ക് പഞ്ചായത്ത് പ്രസിഡൻറ്​ ജെറി മാത്യു സാം, ആറന്മുള പഞ്ചായത്ത് പ്രസിഡൻറ്​ ഐഷ പുരുഷോത്തമന്‍, കോഴഞ്ചേരി പഞ്ചായത്ത് പ്രസിഡൻറ്​ മിനി ശ്യം മോഹന്‍, തോട്ടപ്പുഴശ്ശേരി പഞ്ചായത്ത് പ്രസിഡൻറ്​ ക്രിസ്​റ്റഫര്‍, കോയിപ്രം പഞ്ചായത്ത് പ്രസിഡൻറ്​ അഡ്വ. കൃഷ്ണകുമാര്‍, മല്ലപ്പുഴശ്ശേരി പഞ്ചായത്ത് പ്രസിഡൻറ്​ ലത വിക്രമന്‍, ഡിവൈ.എസ്പി എസ്. സജീവ്, ആറന്മുള പള്ളിയോട സേവാസംഘം പ്രസിഡൻറ്​ കൃഷ്ണകുമാര്‍ കൃഷ്ണവേണി, ആറന്മുള, കോഴഞ്ചേരി, തോട്ടപ്പുഴശ്ശേരി, കോയിപ്രം ഗ്രാമപഞ്ചായത്ത് സെക്രട്ടറിമാര്‍ തുടങ്ങിയവര്‍ പങ്കെടുത്തു.