കോന്നിയിൽ വൈദ്യുതി മുടക്കം ഓൺലൈൻ പഠനത്തെ ബാധിക്കുന്നു

കോന്നി: കോന്നിയിൽ അടിക്കടിയുണ്ടാകുന്ന വൈദ്യുതി മുടക്കം ഓൺലൈൻ പഠന സംവിധാനത്തെ സാരമായി ബാധിക്കുന്നതായി പരാതി. ദിവസങ്ങളായി കോന്നി നഗരത്തിലും പരിസര പ്രദേശങ്ങളിലും ഉച്ചക്ക്​ ഒരുമണിയോടെ വൈദ്യുതി മുടങ്ങിയാൽ വൈകീട്ട്​ മൂന്ന് മണിയോടെയാണ് വീണ്ടും വൈദ്യുതി ലഭിക്കുക. ഇത് ഉച്ചസമയങ്ങളിലെ ക്ലാസുകളെ സാരമായി ബാധിക്കുന്നുണ്ടെന്ന് കുട്ടികളും രക്ഷിതാക്കളും പറയുന്നു. മഴയോ കാറ്റോ ഒന്നുമില്ലാതെയാണ് പലയിടങ്ങളിലും വൈദ്യുതി മുടങ്ങുന്നതെന്നും നാട്ടുകാർ പറയുന്നു. നിരവധിതവണ വിഷയം നാട്ടുകാർ അധികൃതരുടെ ശ്രദ്ധയിൽപെടുത്തിയിട്ടും നടപടിയില്ലെന്ന് ആക്ഷേപമുണ്ട്.