കുഴിയില്ലാത്ത റോഡുകളാണ് ലക്ഷ്യം -മന്ത്രി മുഹമ്മദ് റിയാസ്

കോന്നി: ഒരു കുഴിയുമില്ലാത്ത രീതിയിൽ കേരളത്തിലെ റോഡുകളെ മാറ്റുകയാണ് സർക്കാർ ലക്ഷ്യമെന്ന് മന്ത്രി പി.എ. മുഹമ്മദ് റിയാസ്. കൊക്കാത്തോട് അള്ളുങ്കൽ ജങ്​ഷനിൽ ആധുനിക നിലവാരത്തില്‍ നിര്‍മിക്കുന്ന കല്ലേലി-കൊക്കത്തോട് റോഡി‍ൻെറ നിര്‍മാണോദ്ഘാടനം നിർവഹിക്കുകയായിരുന്നു മന്ത്രി. ഘട്ടം ഘട്ടമായി റോഡുകളുടെ പൂർണ പരിപാലനം നടത്തുകയാണ് ലക്ഷ്യം. സുതാര്യത ഉറപ്പുവരുത്തി മുന്നോട്ടുപോകാനാണ് സർക്കാർ ശ്രമിക്കുന്നത്. ഈ ശ്രമത്തിൽ ജനങ്ങൾ കാഴ്ചക്കാരല്ല കാവൽക്കാരാണെന്നും മന്ത്രി പറഞ്ഞു. രണ്ടര വർഷംകൊണ്ട് കൊക്കാത്തോടി‍ൻെറ വികസനത്തിനു വേണ്ടി 27.68 കോടി രൂപയുടെ പദ്ധതികൾ പുരോഗമിക്കുകയാണെന്ന് അധ്യക്ഷത വഹിച്ച കെ.യു. ജനീഷ്​കുമാർ എം.എൽ.എ പറഞ്ഞു. കല്ലേലി- കൊക്കാത്തോട് റോഡ് സംസ്ഥാന ബജറ്റില്‍ 10 കോടി രൂപ വകയിരുത്തിയാണ് ആധുനിക നിലവാരത്തില്‍ നിര്‍മിക്കുന്നത്. ബ്ലോക്ക് പഞ്ചായത്ത് പ്രസിഡന്‍റ്​ ജിജി സജി, അരുവാപ്പുലം പഞ്ചായത്ത് പ്രസിഡന്‍റ്​ രേഷ്മ മറിയം റോയ്, ജില്ല പഞ്ചായത്ത് അംഗം ജിജോ മോഡി, പഞ്ചായത്ത് വൈസ് പ്രസിഡന്‍റ്​ മണിയമ്മ രാമചന്ദ്രൻ, വർഗീസ് ബേബി, പി. സിന്ധു, വി. ശ്രീകുമാർ, സി.എൻ. ബിന്ദു, വി.കെ. രഘു, ജോജു വർഗീസ്, എസ്. ശ്രീലത, ബി. വിനു, കോന്നി വിജയകുമാർ തുടങ്ങിയവര്‍ പങ്കെടുത്തു.