സ്മാർട്ട്‌ അംഗൻവാടി ഉദ്ഘാടനം

പത്തനംതിട്ട: നഗരസഭ കുമ്പഴ നോർത്ത്​ 82ാം നമ്പർ സ്മാർട്ട്‌ അംഗൻവാടി നഗരസഭ ചെയർമാൻ അഡ്വ. സക്കീർ ഹുസൈൻ ഉദ്ഘാടനം ചെയ്തു. കലയിലൂടെ പഠനം എന്ന ആശയത്തിൽ ചുവർചിത്രങ്ങളും പൂർണമായും ശീതീകരിച്ച പഠനമുറിയും പുതിയ കളിയുപകരണങ്ങളും അടക്കം 10 ലക്ഷം രൂപ മുടക്കിയാണ് നവീകരിച്ച്​ സ്മാർട്ട്‌ അംഗൻവാടിയാക്കിയത്. കുട്ടികൾക്ക് പഠനത്തോടൊപ്പം ആനന്ദവും നൽകാൻ അനിമേഷൻ ചിത്രങ്ങളിലൂടെയുള്ള പഠനരീതിയാണിവിടെ. വാർഡിലെ പൊതുപ്രവർത്തനങ്ങൾക്ക് ഉതകുംവിധം കോൺഫറൻസ് ഹാളും സി.സി ടി.വി അടക്കമുള്ള സംവിധാനങ്ങളും മുകൾ നിലയിൽ സജ്ജീകരിച്ചിട്ടുണ്ട്. പൊതുമരാമത്ത് സ്റ്റാൻഡിങ്​ കമ്മിറ്റി ചെയർപേഴ്സൻ ഇന്ദിരമണിയമ്മ അധ്യക്ഷത വഹിച്ചു. ഡെപ്യൂട്ടി ചെയർപേഴ്സൻ ആമിന ഹൈദരലി, സ്റ്റാൻഡിങ്​ കമ്മിറ്റി ചെയർമാൻമാരായ ജെറി അലക്സ്‌, അംബിക വേണു, പ്രതിപക്ഷ നേതാവ് കെ. ജാസിം കുട്ടി​, കൗൺസിലർമാരായ എ. അഷ്‌റഫ്‌, വിമല ശിവൻ, ഷീല, സുജ അജി, ആനി സജി, ഷൈലജ, മുനിസിപ്പൽ എൻജിനീയർ സുധീർ രാജ്, കമ്യൂണിറ്റി കൗൺസിലർ രാജു സി. നായർ തുടങ്ങിയവർ പങ്കെടുത്തു.