കോഴഞ്ചേരിയിൽ അനധികൃത പാര്‍ക്കിങ്​ വ്യാപകം

കോഴഞ്ചേരി: നിയമം പാലിക്കേണ്ടവർ തന്നെ അത്​ ലംഘിക്കുന്ന കാഴ്ചയാണ്​ കോഴഞ്ചേരി ടൗണിലെ പാർക്കിങ്ങിന്‍റെ കാര്യത്തിൽ നടക്കുന്നത്​. റോഡിന് ഇരുവശവും പാർക്ക്​ ചെയ്ത വാഹനങ്ങളുടെ നീണ്ടനിരയാണ്​ എപ്പോഴും. ഇവയിൽ മിക്കതും പൊലീസ് അടക്കമുള്ള സര്‍ക്കാര്‍ വാഹനങ്ങളാണ്​. ഇതുവഴി പോകുന്ന വാഹനയാത്രക്കാരും കാൽനടക്കാരും ഇതുമൂലം ഏറെ ബുദ്ധിമുട്ടുന്നു. കോഴഞ്ചേരി-ഇലവുംതിട്ട റോഡില്‍ തെക്കേമലക്കും പന്നിവേലിച്ചിറക്കും മധ്യയുള്ള അരകിലോമീറ്റര്‍ ദൂരം കടന്നുകിട്ടാന്‍ ഇപ്പോള്‍ മണിക്കൂറുകര്‍ കാത്തുകിടക്കേണ്ട അവസ്ഥയാണ്​. സ്‌കൂള്‍ കുട്ടികളാണ് ഏറെ ബുദ്ധിമുട്ടുന്നത്. കോഴഞ്ചേരി-തെക്കേമല-ഇലവുംതിട്ട റോഡില്‍ പഴയ പ്രശാന്ത് തിയറ്റര്‍ മുതലാണ് അനധികൃത പാര്‍ക്കിങ്​. ഇടുങ്ങിയ പാതയുടെ ഇരുവശത്തും വാഹനങ്ങള്‍ പാര്‍ക്ക്​ ചെയ്യുന്നതോടെ അടിയന്തര ആവശ്യങ്ങള്‍ക്ക് പോകേണ്ട വാഹനങ്ങള്‍ ഗതാഗതക്കുരുക്കില്‍ അകപ്പെടുന്നു. ഈ സ്ഥലത്ത് പ്രവർത്തിക്കുന്ന സര്‍വിസ് സെന്ററില്‍ വരുന്ന വാഹനങ്ങളാണ് റോഡ് കൈയടക്കി പാര്‍ക്ക്​ ചെയ്യുന്നതെന്ന് നാട്ടുകാര്‍ പറയുന്നു. സര്‍വിസ് സെന്ററില്‍ വരുന്ന വാഹനങ്ങള്‍ അവരുടെ കോമ്പൗണ്ടില്‍ ഇടാതെ റോഡിലേക്ക് ഇറക്കി പാര്‍ക്ക് ചെയ്യുകയാണെന്നും ആരോപണമുണ്ട്. ഇതില്‍ നിരവധി പൊലീസ്, എക്‌സൈസ് വാഹനങ്ങളുമുണ്ട്. പൊലീസ് ബോര്‍ഡ് കാണുന്നതിനാല്‍ ആരും പ്രതികരിക്കാറുമില്ല. ഇരുവശത്തുനിന്ന്​ വാഹനങ്ങള്‍ വന്നാല്‍ ഇടുങ്ങിയ റോഡില്‍ കടന്നുപോകാന്‍ കഴിയുന്നില്ല. ഗതാഗതക്കുരുക്ക് തെക്കേമല ജങ്ഷനിലേക്ക് നീളുന്നതോടെ തിരുവല്ല-പത്തനംതിട്ട, ആറന്മുള-കോഴഞ്ചേരി സംസ്ഥാന പാതകളും സ്തംഭിക്കും. റോഡിനു സമീപം പാര്‍ക്ക് ചെയ്യുന്ന വാഹനങ്ങളെ പെറ്റിയടിക്കാന്‍ ഓടുന്ന പൊലീസ് ഇവിടെ കണ്ണടക്കുകയാണ്. രണ്ടു സൈഡ് പാര്‍ക്കിങ്​ ഒരുതരത്തിലും അംഗീകരിക്കാന്‍ കഴിയില്ലെന്നും പ്രത്യേകിച്ച് വളവുവരുന്ന സ്ഥലത്താണ് അനധികൃത പാര്‍ക്കിങ്​ നടക്കുന്നതെന്നും നാട്ടുകാര്‍ ചൂണ്ടിക്കാട്ടുന്നു. ഇലവുംതിട്ട-തെക്കേമല റോഡ് വികസനം നടന്നപ്പോള്‍ ഈ ഭാഗത്തുമാത്രം വീതികൂട്ടല്‍ നടന്നില്ല. ഗ്രാമപഞ്ചായത്തും പൊലീസും അടിയന്തര നടപടി സ്വീകരിക്കണമെന്ന് കോഴഞ്ചേരി പൗരാവലി ആവശ്യപ്പെട്ടു.