മിനി ഇൻഡസ്ട്രിയൽ എസ്റ്റേറ്റ്​ റോഡിൽ യാത്ര ദുസ്സഹം

മല്ലപ്പള്ളി: വ്യവസായ വകുപ്പിന്‍റെ മിനി ഇൻഡസ്ട്രിയൽ എസ്റ്റേറ്റിലേക്കുള്ള റോഡിൽ യാത്ര ദുസ്സഹമായി. റോഡിൽ കുണ്ടും കുഴിയും നിറഞ്ഞ് സഞ്ചാരയോഗ്യമല്ലാതായിട്ട് മാസങ്ങൾ കഴിഞ്ഞു. ശോച്യാവസ്ഥക്ക് പരിഹാരം ഉണ്ടാകണമെന്നാണ്​ നാട്ടുകാരുടെ ആവശ്യം. വർഷങ്ങൾക്ക് മുമ്പ്​ പ്രവർത്തനം തുടങ്ങിയ മിനി ഇൻഡസ്ട്രിയൽ എസ്​റ്റേറ്റിൽ ടയർ റീട്രെഡിങ്, പ്രസ്, പെറ്റ് ബോട്ടിൽ, ഐസ്, ഫർണിച്ചർ, റബർ ചവിട്ടി, വയറിങ് പൈപ്പ്, ഇരുമ്പ് അലമാര തുടങ്ങിയ വ്യവസായങ്ങളാണ് പ്രവർത്തിക്കുന്നത്. നിരവധി വാഹനങ്ങൾ എത്തുന്ന ഈ റോഡിലെ ടാറിങ്​ പൂർണമായും ഇളകി. ഇത് അപകടങ്ങൾക്കും കാരണമാകുന്നു. അധികൃതരുടെ അനാസ്ഥയാണ് റോഡിന്‍റെ ദുരവസ്ഥക്ക് കാരണമെന്ന് നാട്ടുകാർ ആരോപിച്ചു.