പന്തളത്തെ പെട്രോൾ പമ്പ്: അപ്പീൽ നൽകണം -യു.ഡി.എഫ്

പന്തളം: ലൈസൻസില്ലാതെ പ്രവർത്തിക്കുന്ന പന്തളത്തെ ഹിന്ദുസ്ഥാൻ പെട്രോളിയത്തിന്‍റെ പമ്പ് പൂട്ടണമെന്ന നഗരസഭ തീരുമാനത്തിനെതിരെ ഹൈകോടതി വിധി വന്ന സാഹചര്യത്തിൽ അപ്പീൽ പോകണമെന്ന്​ യു.ഡി.എഫ് ആവശ്യപ്പെട്ടു. പന്തളം ടൗണിന്‍റെ ഹൃദയഭാഗത്തെ ഹിന്ദുസ്ഥാൻ പെട്രോളിയം വക പമ്പ് മൂന്നുവർഷമായി ലൈസൻസ് ഇല്ലാതെ പ്രവർത്തിക്കുകയായിരുന്നു. നഗരസഭ മുൻ സെക്രട്ടറി ജയകുമാർ പമ്പ് പൂട്ടിച്ചിരുന്നു. ഇതിനെതിരെ പമ്പ്​ ഉടമ ഹൈകോടതിയിൽ നൽകിയ ഹരജിയിൽ അനുകൂല വിധി സമ്പാദിച്ചത്​ നഗരസഭ അഭിഭാഷകൻ ഒത്തുകളിച്ചതിനാലാണെന്നും യു.ഡി.എഫ്​ ആരോപിച്ചു. ലൈസൻസ് പുതുക്കണമെങ്കിൽ സ്ഥല ഉടമയുടെ സമ്മതപത്രം വേണം. അതില്ലാതിരുന്നിട്ടും പമ്പ്​ തുറക്കാൻ അനുമതി നൽകി ഹൈകോടതിയിൽനിന്ന്​ വിധിയുണ്ടായത്​. പുതിയ അഭിഭാഷകനെ നിയമിക്കണമെന്ന കൗൺസിൽ തീരുമാനം നടപ്പാക്കാതെ പഴയയാളെ തന്നെ നിയമിക്കാൻ സെക്രട്ടറിക്കു കത്തുകൊടുത്ത ചെയർപേഴ്സന്‍റെ നടപടി ദുരൂഹത വർധിപ്പിക്കുന്നെന്നും യു.ഡി.എഫ് കൗൺസിലർമാരായ കെ.ആർ. വിജയകുമാർ, കെ.ആർ. രവി, പന്തളം മഹേഷ്, സുനിത വേണു, രത്നമണി സുരേന്ദ്രൻ എന്നിവർ പറഞ്ഞു.