സീതത്തോട് പഞ്ചായത്തിൽ കമ്പ്യൂട്ടർ അഴിമിയെന്ന്​

പഞ്ചായത്ത്​ സെക്രട്ടറി ടെൻഡറിൽ വഴിവിട്ട് ഇടപെട്ടതായി ആരോപണം പത്തനംതിട്ട: സീതത്തോട് പഞ്ചായത്തിൽ കമ്പ്യൂട്ടറും അനുബന്ധ ഉപകരണങ്ങളും വാങ്ങിയതിൽ അഴിമതി നടന്നതായി സീതത്തോട്​ ​ഐ സോൺ ദ ഐ.ടി സ്റ്റോർ ഉടമ രാജേഷ്​ കെ. നായർ വാർത്തസമ്മേളനത്തിൽ ആരോപിച്ചു. പഞ്ചായത്ത്​ സെക്രട്ടറി ടെൻഡറിൽ വഴിവിട്ട് ഇടപെടുകയും ഇതുസംബന്ധിച്ച് പരാതി നൽകിയപ്പോൾ വ്യാജ രേഖകൾ ചമച്ച് കരാറിനെ സാധൂകരിക്കാൻ ശ്രമിക്കുകയും ചെയ്തു. പഞ്ചായത്ത് ഡയറക്ടർ, ഡെപ്യൂട്ടി ഡയറക്ടർ, വിജിലൻസ് ഡിവൈ.എസ്​.പി എന്നിവിടങ്ങളിൽ അഴിമതി സംബന്ധിച്ച്​ പരാതി നൽകിയിട്ടും നടപടി ഉണ്ടായില്ല. അഴിമതി നടത്തിയ ഉദ്യോഗസ്ഥനെ സംരക്ഷിക്കാനാണ്​ ശ്രമം. സെക്രട്ടറി ഈ മാസം 31ന് ജോലിയിൽനിന്ന് വിരമിക്കുന്നതുവരെ അന്വേഷണം മന്ദഗതിയിലാക്കാൻ ഉന്നത ഇടപെടൽ നടക്കുന്നുണ്ട്​. നീതി ലഭിക്കാത്തതിൽ പ്രതിഷേധിച്ച് പത്തനംതിട്ട ഡി.ഡി.പി ഓഫിസിന് മുന്നിൽ വ്യാഴാഴ്ച മുതൽ കണ്ണുകൾ മൂടക്കെട്ടി സത്യഗ്രഹ സമരം ആരംഭിച്ചതായും​ രാജേഷ്​ പറഞ്ഞു. താൻ 41,000 രൂപ രേഖ​പ്പെടുത്തിയ അതേ ഡെസ്ക്ടോപ് കമ്പ്യൂട്ടർ 52,500 രൂപ വിലയിൽ ഓർഡർ കൊടുത്തു. ടെൻഡർ നോട്ടീസ് പ്രകാരം ലേസർ പ്രിന്‍റർ, എ ത്രീ ലേസർ കോപ്പിയർ എന്നിവ വാങ്ങേണ്ടതിന് പകരം ഇങ്ക് ടാങ്ക് പ്രിന്‍റർ, എ ത്രി ഇങ്ക് ടാങ്ക് കോപ്പിയർ എന്നിവക്ക്​ ഉയർന്ന നിരക്കിൽ ഓർഡർ നൽകി. ടെൻഡർ നോട്ടീസ് പ്രകാരം എ ത്രീ ഷീറ്റ് ഫെഡ് സ്കാനർ വാങ്ങേണ്ടതിന് പകരം ഉപയോഗമില്ലാത്ത എ ഫോർ ഷീറ്റ് ഫെഡ് സ്കാനർ ഉയർന്ന നിരക്കിൽ വാങ്ങി. ടെൻഡറിൻമേൽ സാങ്കേതിക നിർദേശങ്ങൾ നൽകേണ്ട ഇൻഫർമേഷൻ കേരള മിഷനുമായി കത്തിടപാടുകളോ ചർച്ചകളോ നടന്നിട്ടില്ലെന്ന് വിവരാവകാശ രേഖകളിൽനിന്ന് വ്യക്തമാകുന്നതായും രാജേഷ് കെ. നായർ പറഞ്ഞു.