കോന്നി നാരായണപുരം ചന്ത ക്ലീൻ

കോന്നി: കെ.യു. ജനീഷ്‌കുമാർ എം.എല്‍.എയുടെ ഇടപെടലി​നെ തുടർന്ന്​ കോന്നി നാരായണപുരം ചന്തയിലെ ദുര്‍ഗന്ധം വമിപ്പിക്കുന്ന മാലിന്യങ്ങള്‍ സംസ്‌കരിച്ചു. കോന്നി ചന്തയില്‍ പുതിയ ഗേറ്റും സി.സി.ടി.വിയും ഉടന്‍ സ്ഥാപിക്കുമെന്ന് പഞ്ചായത്ത് അധികൃതര്‍ ഉറപ്പ് നല്‍കി. ടോയ്​ലെറ്റുകള്‍ ഉപയോഗയോഗ്യമാക്കുമെന്നും മത്സ്യമാര്‍ക്കറ്റിൽ തന്നെ വിപണനം നടത്തുന്നതിന്​ ക്രമീകരണം ഒരുക്കുമെന്നും മാലിന്യപ്രശ്നം ശാശ്വതമായി പരിഹരിക്കുന്നതിന്​ പഞ്ചായത്ത് തലത്തില്‍ പ്രത്യേക യോഗം വിളിക്കുമെന്നും എം.എല്‍.എ അറിയിച്ചു. മന്ത്രി വീണജോര്‍ജിന്റെ അധ്യക്ഷതയില്‍ മഴക്കാല രോഗപ്രതിരോധ പ്രവര്‍ത്തനങ്ങള്‍ വിലയിരുത്തുന്നതിന് ആരോഗ്യജാഗ്രതാ യോഗം ഓണ്‍ലൈനായി കഴിഞ്ഞദിവസം ചേര്‍ന്നിരുന്നു. നാരായണപുരം ചന്തയിലെ മാലിന്യപ്രശ്‌നം പരിഹരിക്കണമെന്ന് കെ.യു. ജനീഷ്‌കുമാര്‍ എം.എല്‍.എ യോഗത്തില്‍ ആവശ്യ​പ്പെട്ടപ്പോൾ മാലിന്യമെല്ലാം സംസ്‌കരിച്ചെന്നായിരുന്നു കോന്നി പഞ്ചായത്ത് സെക്രട്ടറി യോഗത്തെ അറിയിച്ചത്. തുടർന്നായിരുന്നു എം.എൽ.എയുടെ ഇടപെടൽ. -------- ഡിജിറ്റല്‍ സേവനവുമായി റാന്നി പെരുനാട് പഞ്ചായത്ത് വടശ്ശേരിക്കര: പഞ്ചായത്തിന്റെ ഡിജിറ്റല്‍വത്കരണ നയത്തിന്റെ ഭാഗമായി സമ്പര്‍ക്കരഹിത പണമിടപാട് പ്രോത്സാഹിപ്പിക്കുക എന്ന ഉദ്ദേശ്യത്തോടെ ഡിജിറ്റലൈസ്ഡ് പേയ്​മെന്റ് സംവിധാനവുമായി റാന്നി പെരുനാട് പഞ്ചായത്ത്. സൗത്ത് ഇന്ത്യന്‍ ബാങ്കുമായി സഹകരിച്ചാണ് പദ്ധതി നടപ്പാക്കിയത്. ജനങ്ങള്‍ക്ക്​ ക്രെഡിറ്റ്/ഡെബിറ്റ് കാര്‍ഡ് മുഖേന വിവിധ സേവനങ്ങള്‍ക്കുള്ള പണം ഇനി അടയ്ക്കാം. ക്യൂ.ആര്‍ കോഡു മുഖേനയുള്ള പേമെന്റ് സൗകര്യവും ലഭിക്കും. റാന്നി പെരുനാട് പഞ്ചായത്ത്​ കാര്യാലയത്തില്‍ നടന്ന ചടങ്ങില്‍ പഞ്ചായത്ത്​ പ്രസിഡന്റ് പി.എസ്. മോഹനന്‍ ഡിജിറ്റല്‍ സേവനങ്ങളുടെ ഉദ്ഘാടനം നിര്‍വഹിച്ചു. വൈസ് പ്രസിഡന്റ് ഡി. ശ്രീകല, സ്റ്റാൻഡിങ് കമ്മിറ്റി ചെയര്‍മാന്‍ മാരായ സി.എസ്. സുകുമാരന്‍, എം.എസ്. ശ്യാം, മോഹിനി വിജയന്‍, പഞ്ചായത്ത് സെക്രട്ടറി ജെ. ഗിരീഷ് കുമാര്‍ എന്നിവര്‍ പങ്കെടുത്തു. ----