അയൽവാസിയെ വെട്ടിയ മധ്യവയസ്കൻ അറസ്റ്റിൽ

തിരുവല്ല: തിരുവല്ല തേവേരിയിൽ റോഡിലേക്കുവീണ മരം വെട്ടിമാറ്റുന്നത് സംബന്ധിച്ച തർക്കത്തിനിടെ അയൽവാസിയെ വെട്ടിപ്പരിക്കേൽപിച്ച സംഭവത്തിൽ മധ്യവയസ്ക്കൻ അറസ്റ്റിലായി. തേവേരി പള്ളിവിരുത്തിയിൽ വീട്ടിൽ തോമസ് വി.ഉമ്മനെയാണ് (ജോളി-56) പുളിക്കീഴ് പൊലീസ് അറസ്റ്റ് ചെയ്തത്. പുളിന്തറ വീട്ടിൽ സതീഷ് കുമാറിനാണ്​ (47) അക്രമത്തിൽ പരിക്കേറ്റത്​. വെള്ളിയാഴ്ച രാവിലെ പതിനൊന്നരയോടെയായിരുന്നു സംഭവം. തലക്ക്​ സാരമായി പരിക്കേറ്റ സതീശനെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഇരുവരും തമ്മിൽ മുൻവൈരാഗ്യം നിലനിന്നിരുന്നതായി പൊലീസ് പറഞ്ഞു. തോമസ് വി.ഉമ്മന്‍റെ പുരയിടത്തിൽനിന്ന ആഞ്ഞിലി ഇന്നലെ രാത്രി റോഡിലേക്ക് കടപുഴകിവീണിരുന്നു. ഇത് വെട്ടിമാറ്റാനായി രാവിലെ പത്തരയോടെ തിരുവല്ലയിൽനിന്നുള്ള അഗ്നിശമന സേന എത്തി. മരം മുറിച്ചുനീക്കുന്നതിന് തോമസ് തടസ്സം പറഞ്ഞു. സംഭവത്തിൽ ഇടപെട്ട വാർഡ്​ അംഗത്തെ തോമസ് അസഭ്യം പറഞ്ഞു. ഇത് ചോദ്യംചെയ്ത സതീഷിനെ തോമസ് വെട്ടുകത്തി ഉപയോഗിച്ച് വെട്ടുകയായിരുന്നു.