തിരുവല്ല നഗരസഭ ചെയർമാനും വൈസ് ചെയർമാനുമെതിരെ അവിശ്വാസത്തിന് എൽ.ഡി.എഫ്

തിരുവല്ല: നഗരസഭ ചെയർമാനും വൈസ് ചെയർമാനുമെതിരെ അവിശ്വാസത്തിന് എൽ.ഡി.എഫ് നീക്കം. യു.ഡി.എഫ് ഭരണസമിതി നടത്തുന്ന അഴിമതിയും വികസന മുരടിപ്പും മുൻനിർത്തി ചെയർമാനും വൈസ് ചെയർമാനുമെതിരെ അടുത്ത ദിവസം അവിശ്വാസത്തിന് നോട്ടീസ് നൽകുമെന്ന് എൽ.ഡി.എഫ് കൗൺസിലർമാർ അറിയിച്ചു. മുനിസിപ്പൽ റീജനൽ ജോയന്‍റ്​ ഡയറക്ടർക്കാണ് നോട്ടീസ് നൽകുന്നത്. ചില പദ്ധതികൾക്ക് കല്ലിട്ടതല്ലാതെ ഒരു വികസനപ്രവർത്തനങ്ങളും നടത്തിയില്ല. ഫണ്ട് ലഭ്യമാക്കിയിട്ടുമില്ല. പലതിനും ഡി.പി.ആർ പോലും തയാറാക്കിയില്ല. നഗരസഭ ചിൽഡ്രൻസ് പാർക്ക് 35 വർഷത്തേക്ക് തുച്ഛമായ വാടകക്ക്​ കോൺഗ്രസ് പ്രവർത്തകന് പാട്ടത്തിന് നൽകി വൻ അഴിമതിനടത്തി. സോഷ്യൽ ഓഡിറ്റിൽ അഴിമതി കണ്ടെത്തിയെങ്കിലും റിപ്പോർട്ട് പുറത്തുവിടാതെ ബി.ജെ.പി സഹായത്തോടെ ഒതുക്കി തീർക്കുകയായിരുന്നു തുടങ്ങി ആരോപണങ്ങൾ ഉന്നയിച്ചു.15 ശുചീകരണ തൊഴിലാളികളുടെ നിയമനത്തിൽ വൻ അഴിമതിയാണ് നടത്തിയതെന്നും എൽ.ഡി.എഫ് കൗൺസിലർമാർ വാർത്തസമ്മേളനത്തിൽ പറഞ്ഞു.