ഏഴംകുളം-കൈപ്പട്ടൂർ പാത കിഫ്ബി അംഗീകാരം ലഭിച്ചിട്ട് രണ്ടുവർഷം: നിർമാണം തുടങ്ങിയില്ല

നിർമാണത്തിന് കരാർ നൽകിയെന്നും ഉടൻ പണി ആരംഭിക്കുമെന്നും പറയാൻ തുടങ്ങിയിട്ട് നാളുകളായി അടൂർ: ഏഴംകുളം-കൈപ്പട്ടൂർ പാത 41.54 കോടി രൂപ ചെലവിൽ ബി.എം ആൻഡ്​​ ബി.സി നിലവാരത്തിൽ നിർമിക്കാൻ കിഫ്ബി അംഗീകാരം ലഭിച്ചിട്ട് രണ്ടു വർഷമായിട്ടും പണികൾ തുടങ്ങിയില്ല. 2020 ജൂണിലാണ് നിർമാണത്തിന് കിഫ്ബി യോഗം അംഗീകാരം നൽകിയത്. 10.208 കിലോമീറ്റർ നീളം വരുന്ന റോഡിന്റെ വീതി 10 മീറ്ററാണ്. ടാർ ചെയ്യുന്നത് ഏഴ് മീറ്റർ വീതിയിലാണെന്നും പറഞ്ഞിരുന്നു. ഒരു പാലം, 20 ഓടകൾ, ബസ് ഷെൽട്ടറുകൾ, റോഡിന്റെ സൈഡ്കെട്ട്, ട്രാഫിക് സേഫ്​റ്റി പ്രവൃത്തികൾ നടത്തി റോഡ് മനോഹരമായി നിർമിക്കുമെന്ന പ്രഖ്യാപനം അവശേഷിക്കുകയാണ്. നിർമാണത്തിന് കരാർ നൽകിയെന്നും ഉടൻ പണി ആരംഭിക്കുമെന്നും പറയാൻ തുടങ്ങിയിട്ട് നാളുകളായി. ധനമന്ത്രിക്കും പൊതുമരാമത്ത് മന്ത്രിക്കും ചിറ്റയം ഗോപകുമാർ എം.എൽ.എ നൽകിയ നിവേദനത്തെ തുടർന്നാണ് കിഫ്ബിയുടെ അംഗീകാരം ലഭിച്ചത്. ഇതേസമയം മാസങ്ങൾക്കു മുമ്പ് അറ്റകുറ്റപ്പണികൾ ചെയ്ത പാത പഴയ സ്ഥിതിയിലേക്കു കൂപ്പുകുത്തുകയാണ്. വൻ കുഴികളിൽ വീണ് കാൽനടക്കാർക്കും ഇരുചക്ര വാഹനയാത്രികർക്കും പരിക്കേറ്റ അപകടങ്ങളുണ്ടായിരുന്നു. പാതയുടെ ഇരുവശത്തും കാട് വളർന്ന് നിൽക്കുകയാണ്. ഏഴംകുളത്ത്​ വള്ളിപ്പടർപ്പുകൾ റോഡിന്റെ ടാറിങ് ഭാഗത്തേക്ക് കയറിയതിനാൽ കാൽനട ദുരിതപൂർണമാണ്. ഇത് അപകടങ്ങൾക്ക് കാരണമാകും. ഇഴജന്തുക്കളുടെ ശല്യവും ഉണ്ട്. വാഹനത്തിൽ പോകുന്നവർ കാട്ടിലേക്ക് മാലിന്യം വലിച്ചെറിയുന്നു. എൽ.ഡി.എഫും യു.ഡി.എഫും മാറി മാറി ഭരിച്ചപ്പോഴും വിവിധ പദ്ധതികൾ ഈ പാത വികസനത്തിന് പ്രഖ്യാപിച്ചിരുന്നു. എം.സി റോഡിൽ കൊട്ടാരക്കര ഭാഗത്തുനിന്ന് അടൂരിൽ പോകാതെ ഏനാത്ത്- ഏഴംകുളം മിനി ഹൈവേയിലൂടെ കായംകുളം-പുനലൂർ പാത മുറിച്ചുകടന്ന് ഏഴംകുളം കൈപ്പട്ടൂർ പാതയിൽ പ്രവേശിച്ച് കൈപ്പട്ടൂർ-പത്തനംതിട്ടയിൽ എത്താവുന്ന തരത്തിൽ ശബരിമല സമാന്തരപാതയായി വർഷങ്ങൾക്കു മുമ്പ് തിരുവഞ്ചൂർ രാധാകൃഷ്ണൻ അടൂർ എം.എൽ.എ ആയിരുന്നപ്പോൾ പ്രഖ്യാപിച്ചിരുന്നു. ഏഴംകുളത്തുനിന്ന്‌ ആരംഭിച്ച് പുതുമല, കൊടുമൺ, ഇടത്തിട്ട, ചന്ദനപ്പള്ളി വഴി കൈപ്പട്ടൂരിൽ ചവറ ടൈറ്റാനിയം- മുണ്ടക്കയം ദേശീയപാതയിലാണ് ഈ പാത ചേരുന്നത്. പറക്കോട്, ഏഴംകുളം, ഏനാദിമംഗലം, ഏനാത്ത്, വയല, കൊടുമൺ തുടങ്ങിയ പ്രദേശങ്ങളിലുള്ളവർക്ക് ജില്ല ആസ്ഥാനത്തെത്താൻ ആധുനിക പാതയാകുന്നതും കാത്തിരിക്കുകയാണ് തദ്ദേശവാസികൾ. ഈ പ്രദേശങ്ങളുടെ വികസനത്തിനും പാത സഹായകരമാകും. നാഗർകോവിൽ, കന്യാകുമാരി, തിരുവനന്തപുരം, കൊല്ലം എന്നിവിടങ്ങളിൽനിന്നുള്ള അയ്യപ്പഭക്തർക്ക് ശബരിമലയിൽ എളുപ്പത്തിലെത്താനുള്ള വഴിയായും ഈ പാത ഉപകരിക്കും. PTL ADR Road ഏഴംകുളം കൈപ്പട്ടൂർ പാത ഏഴംകുളം ജങ്ഷന്​ സമീപം കാടുകയറിയ നിലയിൽ lead4