മെത്താഫിറ്റമിനുമായി യുവാവ് അറസ്റ്റിൽ

പാലക്കാട്: വാളയാർ എക്സൈസ് ചെക്ക്പോസ്റ്റിൽ 230 ഗ്രാം മെത്താഫിറ്റമിനുമായി യുവാവ് അറസ്റ്റിൽ. മലപ്പുറം തിരൂർ ചെങ്ങോട്ടൂർ സ്വദേശി സന്ദീപാണ് (35) എക്സൈസിന്റെ പിടിയിലായത്. കോയമ്പത്തൂരിൽനിന്നും പാലക്കാട്ടേക്ക് വരികയായിരുന്ന കെ.എസ്.ആർ.ടി.സിയിൽ കടത്തുകയായിരുന്ന മയക്കുമരുന്നാണ് വാഹനപരിശോധനയിൽ കണ്ടെടുത്തത്. ചൊവ്വാഴ്ച ഉച്ചക്ക് ഒരു മണിക്കായിരുന്നു സംഭവം.

യുവാവിനെതിരെ എൻ.ഡി.പി.എസ് നിയമപ്രകാരം കേസെടുത്തു. എക്സൈസ് സർക്കിൾ ഇൻസ്പെക്ടർ പി. രമേഷിന്റെ നേതൃത്വത്തിൽ നടത്തിയ വാഹന പരിശോധനയിൽ എക്സൈസ് ഇൻസ്പെക്ടർ എൻ. പ്രേമാനന്ദകുമാർ, അസി. എക്സൈസ് ഇൻസ്പെക്ടർമാരായ എ. മുഹമ്മദ് റിയാസ്, പി.കെ. ഷിബു, ദേവകുമാർ, ഗ്രേഡ് പ്രിവന്റിവ് ഓഫിസർമാരായ ശ്രീധർ, കെ.എം. സജീഷ്, സിവിൽ എക്സൈസ് ഓഫിസർമാരായ കിഷോർ, അജിത്, അരുൺ, അശ്വാന്ത്, സുബിൻ രാജ് എന്നിവർ പങ്കെടുത്തു.