കാർ പിക്അപ് വാനിലിടിച്ച് രണ്ടുപേർക്ക് പരിക്ക്

കല്ലടിക്കോട്: കാർ പിക്അപ് വാനിലിടിച്ച് കാർ യാത്രക്കാരായ സഹോദരങ്ങൾക്ക് പരിക്കറ്റു. കോങ്ങാട് പേഴുംതറ സിദ്ദീഖിന്‍റെ മകൻ സൽമാൻ ഫാരിസ് (22), സഹോദരി ശിഫ എന്നിവർക്കാണ് പരിക്കേറ്റത്.

ഇവരെ ആദ്യം പാലക്കാട് ജില്ല ആശുപത്രിയിൽ പ്രവേശിപ്പിച്ചു. തുടർന്ന് സൽമാനുൽ ഫാരിസിനെ തൃശൂർ മെഡിക്കൽ കോളജിലേക്ക് വിദഗ്ധ ചികിത്സക്കായി മാറ്റി. പാലക്കാട്-കോഴിക്കോട് ദേശീയപാതയിൽ കല്ലടിക്കോട് അയ്യപ്പൻകാവിന് സമീപം വെള്ളിയാഴ്ച രാവിലെ 9.20നാണ് സംഭവം.

കാഞ്ഞിക്കുളം ഭാഗത്തുനിന്നുവരുന്ന കാർ പാൽ കയറ്റാൻ നിർത്തിയിട്ട പിക്അപ് വാനിന്‍റെ പിറകിലിടിച്ച ശേഷം നിയന്ത്രണംവിട്ട് കറങ്ങി മറ്റൊരു പിക്അപ് വാനിലിടിച്ച് നിൽക്കുകയായിരുന്നു. നാട്ടുകാരാണ് അപകടത്തിൽ പരിക്കേറ്റവരെ ആശുപത്രിയിലെത്തിച്ചത്. കാർ ഭാഗികമായി തകർന്നു. മറ്റ് രണ്ട് വാഹനങ്ങൾക്കും കേടുപാട് സംഭവിച്ചു.കല്ലടിക്കോട് പൊലീസ് സ്ഥലത്തെത്തി.