കേരളത്തോട്​ ചേർന്ന ഡാമുകളും നിറഞ്ഞുകവിയുന്നു

കോയമ്പത്തൂർ: പശ്ചിമഘട്ട മലനിരകളിൽ കനത്ത മഴ പെയ്യുന്ന നിലയിൽ കേരളത്തോട്​ ചേർന്ന തമിഴ്​നാട്ടിലെ പറമ്പിക്കുളം, പില്ലൂർ ഡാമുകൾ നിറഞ്ഞു. പാലക്കാട്​ ജില്ലയിലെ മണ്ണാർക്കാട്​ താലൂക്കിൽപെട്ട ശിരുവാണി ഡാമിലെ ജലനിരപ്പും ക്രമാതീതമായി ഉയർന്നു. ശിരുവാണി ഡാമും അടുത്ത ദിവസം നിറഞ്ഞുകവിയും.

കോയമ്പത്തൂർ പൊള്ളാച്ചിക്ക്​ സമീപം സ്ഥിതിചെയ്യുന്ന 72 അടി ഉയരമുള്ള പറമ്പികുളം ഡാം ശനിയാഴ്​ച വൈകീ​േട്ടാടെ നിറഞ്ഞു. ഇതോടെ ഡാമിലെ മൂന്ന്​ ഷട്ടറുകളും തുറന്നു. സെക്കൻഡിൽ 2000 ഘനഅടി വെള്ളമാണ്​ പു​റ​ത്തേക്ക്​ വിടുന്നത്​. 2019 ഒക്​ടോബറിലും ഡാം നിറഞ്ഞിരുന്നു.

ഇതുപോലെ മേട്ടുപാളയത്തിലെ 100 അടി ഉയരമുള്ള പില്ലൂർ ഡാമും തുറന്നു. ഞായറാഴ്​ച രാവിലെ എട്ടരയോടെ നാല്​ ഷട്ടറുകൾ വഴി 7,000 ഘനഅടിയും വൈദ്യുതോൽപാദനത്തിനായി 3000 ഘനഅടിയുമാണ്​ തുറന്നുവിടുന്നത്​. ഡാമിൽനിന്നുള്ള വെള്ളം ഭവാനിപ്പുഴയിലേക്കാണ്​ ഒഴുക്കുന്നത്​. ഇതുകാരണം ഭവാനിപ്പുഴയുടെ കരയോരങ്ങളിൽ താമസിക്കുന്നവർക്ക്​ നേരത്തേ മുന്നറിയിപ്പ്​ നൽകിയിരുന്നു. ഇക്കൊല്ലം ഇത്​ രണ്ടാം തവണയാണ്​ ഡാം നിറഞ്ഞത്​. ആഗസ്​റ്റിൽ 36,000 ഘനഅടി വെള്ളമാണ്​ പുറത്തുവിട്ടത്​. ഉടുമൽപേട്ടക്ക്​ സമീപം സ്ഥിതിചെയ്യുന്ന 90 അടി ശേഷിയുള്ള അമരവാതി ഡാമിൽ 89.5 അടിവെള്ളമുണ്ട്​. ഡാമി​െൻറ സുരക്ഷ കണക്കിലെടുത്തും കാർഷികാവശ്യങ്ങൾക്കുമായി ഞായറാഴ്​ച ഏഴ്​ ഷട്ടറുകൾ തറുന്നു.

49.53 അടി ശേഷിയുള്ള ശിരുവാണി ഡാമിൽ ജലവിതാനം 43.2 അടിയായി ഉയർന്നു. കോയമ്പത്തൂർ ജില്ല കുടിവെള്ളത്തിനായി ഇൗ ഡാമിലെ വെള്ളത്തെയാണ്​ ആശ്രയിച്ചുവരുന്നത്​. രണ്ടുദിവസമായി കോയമ്പത്തൂർ മേഖലയിലും നല്ല മഴയാണ്​ ലഭിച്ചത്​.