സിമന്‍റ് കണ്ടെയ്‌നർ ലോറി മറിഞ്ഞു

പട്ടാമ്പി: കൊപ്പത്ത് കണ്ടെയ്‌നർ ലോറി മറിഞ്ഞു. വലിയ അപകടം ഒഴിവായി. ഗുരുതര പരിക്കേറ്റ തമിഴ്നാട് സ്വദേശിയായ ഡ്രൈവറെ ആശുപത്രിയിൽ പ്രവേശിപ്പിച്ചു. തിങ്കളാഴ്ച രാവിലെ 11.30നാണ് കൊപ്പം-വളാഞ്ചേരി റോഡിൽ പുലാശ്ശേരിയിൽ സിമന്റ് മിശ്രിതം കയറ്റിവന്ന ലോറി മറിഞ്ഞത്.

റോഡിൽനിന്ന് തെന്നി നീങ്ങിയ ലോറി തിരിച്ചു കയറ്റുന്നതിനിടെ റോഡിന്‍റെ ഇറക്കവും ചരിവും മൂലം നിയന്ത്രണംവിട്ട് മറിയുകയായിരുന്നു. സമീപത്തെ 33 കെ.വി വൈദ്യുതി തൂണും ഇടിച്ചുതകർത്തു. കൊപ്പം-വളാഞ്ചേരി റോഡിൽ അൽപ നേരം ഗതാഗതം തടസ്സപ്പെട്ടു.

ലോറിയുടെ ടാങ്ക് പൊട്ടി ഡീസൽ പരന്നൊഴുകിയത് ആശങ്കയുണ്ടാക്കി. പട്ടാമ്പി അഗ്നിരക്ഷ സേനയെത്തി ടാങ്ക് നീക്കം ചെയ്താണ് അപകടാവസ്ഥ ഒഴിവാക്കിയത്.