മണ്ണൂരിൽ പട്ടാപ്പകൽ രണ്ടിടത്ത്​ മോഷണം

മണ്ണൂർ: മണ്ണൂരിൽ പട്ടാപ്പകൽ രണ്ടിടത്ത്​ മോഷണം. പലചരക്കുകടയുടെ ഷട്ടർ തുറന്ന​ും വീട്ടിലുമാണ്​ മോഷണം. മണ്ണൂർ വെസ്​റ്റ്​ അകവണ്ടയിൽ പാലക്കപറമ്പ് കൃഷ്ണൻകുട്ടിയുടെ പലചരക്കുകടയിലാണ് ഷട്ടർ ഉയർത്തി മോഷണം നടന്നത്​. മേശവലിപ്പിനകത്ത് സൂക്ഷിച്ച ബാഗാണ് പോയത്.

ബാഗിനകത്ത് ചില്ലറ നാണയങ്ങളും നോട്ടുകളുമടക്കം മൂവായിരത്തോളം രൂപയും പോസ്​​റ്റ്​ ഒാഫിസിലെ മൂന്ന് പാസ്ബുക്ക്, മറ്റുരേഖകളും ഉണ്ടായിരുന്നു. ബുധനാഴ്ച ഉച്ച രണ്ടോടെയാണ് സംഭവം. കടയിലെ ഷട്ടർ താഴ്​ത്തിയശേഷം തൊട്ടുപിറകിലുള്ള വീട്ടിലേക്കുവന്ന സമയത്താണ്​ മോഷണം നടന്നത്. പരാതി നൽകിയതിനെ തുടർന്ന് ഒറ്റപ്പാലം പൊലീസ് സ്ഥലത്തെത്തി പരിശോധന നടത്തി.

വേങ്ങശ്ശേരി അകവണ്ട വല്ലയംകുന്നത്ത് അമ്മിണിയുടെ വീട്ടിലാണ്​ മോഷണം നടന്നത്​. അലമാരയിൽ ബാഗിൽ സൂക്ഷിച്ച 3,500 രൂപയും ഒരുഗ്രാം സ്വർണമോതിരവും നഷ്​ടപ്പെട്ടു. വയോധികയായ അമ്മിണി മാത്രമാണ് ഇവിടെ ഉണ്ടായിരുന്നത്. മറ്റുള്ളവർ സമീപത്തെ വിവാഹ വീട്ടിലേക്ക് പോയിരുന്നു.

മോഷണം പോയ ബാഗ്​ സമീപത്തുനിന്ന്​ ഉപേക്ഷിച്ച നിലയിൽ കണ്ടെത്തി. ഒന്നര കിലോമീറ്ററിനുള്ളിലാണ് രണ്ടിനും മൂന്നിനും ഇടയിൽ പട്ടാപ്പകൽ രണ്ടുമോഷണങ്ങളും നടന്നത്.