ഒ​റ്റ​പ്പാ​ലം ബ​സ് സ്റ്റാ​ൻ​ഡി​ൽ ത​ല​തി​രി​ഞ്ഞ പാ​ർ​ക്കി​ങ്ങി​ന് താ​ൽ​ക്കാ​ലി​ക വി​രാ​മം

ഒ​റ്റ​പ്പാ​ലം: ന​ഗ​ര​സ​ഭ ബ​സ് സ്റ്റാ​ൻ​ഡി​ലെ ബ​സു​ക​ളു​ടെ ത​ല​തി​രി​ഞ്ഞ പാ​ർ​ക്കി​ങ്ങി​ന് താ​ൽ​ക്കാ​ലി​ക വി​രാ​മം. ഏ​റെ​നാ​ള​ത്തെ മു​റ​വി​ളി​ക​ൾ​ക്കൊ​ടു​വി​ൽ ബ​സ് കാ​ത്ത് നി​ൽ​ക്കു​ന്ന​വ​ർ​ക്കാ​യി ഒ​രു​ക്കി​യ ടെ​ർ​മി​ന​ലി​ലെ ഇ​രി​പ്പി​ട​ങ്ങ​ൾ​ക്ക് അ​ഭി​മു​ഖ​മാ​യി ബ​സു​ക​ൾ തി​ങ്ക​ളാ​ഴ്ച രാ​വി​ലെ മു​ത​ൽ പാ​ർ​ക്കി​ങ് ആ​രം​ഭി​ച്ചു. യാ​ത്ര​ക്കാ​ർ​ക്ക് ബ​സി​ന്‍റെ പി​ൻ​വ​ശം കാ​ണാ​വു​ന്ന വി​ധ​ത്തി​ൽ പു​റം​തി​രി​ച്ചാ​ണ് ഇ​തു​വ​രെ ബ​സു​ക​ൾ പാ​ർ​ക്ക് ചെ​യ്തി​രു​ന്ന​ത്.

ഇ​തു​മൂ​ലം യാ​ത്ര​ക്കാ​ർ​ക്ക് അ​നു​ഭ​വ​പ്പെ​ട്ട ബു​ദ്ധി​മു​ട്ടും അ​പ​ക​ട​ഭീ​ഷ​ണി​യും ക​ണ​ക്കി​ലെ​ടു​ത്ത്‌ ഈ ​രീ​തി​യി​ൽ മാ​റ്റം വ​രു​ത്ത​ണ​മെ​ന്ന് ആ​വ​ശ്യ​പ്പെ​ട്ട് ട്രാ​ഫി​ക്ക് റെ​ഗു​ലേ​റ്റ​റി ക​മ്മി​റ്റി, താ​ലൂ​ക്ക് വി​ക​സ​ന സ​മി​തി യോ​ഗ​ങ്ങ​ളി​ൽ പ​രാ​തി​ക​ളെ​ത്തി​യെ​ങ്കി​ലും ത​ല​തി​രി​ഞ്ഞ പ​രി​ഷ്‌​കാ​രം തു​ട​രു​ക​യാ​യി​രു​ന്നു.

മ​ഴ​യോ വെ​യി​ലോ ഭേ​ദ​മി​ല്ലാ​തെ കൈ​ക്കു​ഞ്ഞു​ങ്ങ​ളു​മാ​യി സ്ത്രീ​ക​ളും വ​യോ​ധി​ക​രും പു​റം​തി​രി​ഞ്ഞ് പാ​ർ​ക്ക് ചെ​യ്യു​ന്ന ബ​സി​ന്‍റെ മു​ന്നി​ൽ​പോ​യി സ്ഥ​ല​നാ​മം വാ​യി​ക്കേ​ണ്ട ഗ​തി​കേ​ടാ​ണ് പ​രാ​തി​ക​ൾ​ക്ക് കാ​ര​ണ​മാ​യ​ത്.

ജി​ല്ല​യി​ലെ വി​സ്തൃ​തി​യു​ള്ള ബ​സ് സ്റ്റാ​ൻ​ഡു​ക​ളി​ൽ ഒ​ന്നാ​യ ഒ​റ്റ​പ്പാ​ല​ത്ത് അ​ശാ​സ്ത്രീ​യ പാ​ർ​ക്കി​ങ് പ​രി​ഷ്കാ​ര​വും സ്റ്റാ​ൻ​ഡി​ന​ക​ത്തേ​ക്ക് വ​രു​ന്ന ബ​സു​ക​ളു​ടെ അ​മി​ത​വേ​ഗ​ത​യും ഒ​ട്ടേ​റെ അ​പ​ക​ട​ങ്ങ​ൾ​ക്കും ജീ​വ​ഹാ​നി​ക്കും ഇ​ട​യാ​യി​ട്ടു​ണ്ട്.

ക​ഴി​ഞ്ഞ മാ​ർ​ച്ച് 31ന് ​കൊ​ൽ​ക്ക​ത്ത സ്വ​ദേ​ശി​യാ​യ തൊ​ഴി​ലാ​ളി മ​രി​ച്ച​തോ​ടെ​യാ​ണ് അ​ധി​കൃ​ത​ർ ഉ​ണ​ർ​ന്ന​ത്. വേ​ഗ​ത നി​യ​ന്ത്രി​ക്കാ​ൻ സ്റ്റാ​ൻ​ഡി​ൽ സ്പീ​ഡ് ബ്രേ​ക്ക​ർ സ്ഥാ​പി​ച്ച​ത് ക​ഴി​ഞ്ഞ ആ​ഴ്ച​യാ​ണ്. ഇ​തി​ന്‍റെ അ​ടു​ത്ത ദി​വ​സം സ്വ​കാ​ര്യ ബ​സ് സ്റ്റാ​ൻ​ഡി​ന്‍റെ ക​മാ​ന​ത്തി​ലി​ടി​ച്ച് ആ​റു​പേ​ർ​ക്ക് പ​രി​ക്കേ​റ്റി​രു​ന്നു.

ഈ ​സാ​ഹ​ച​ര്യം കൂ​ടി ക​ണ​ക്കി​ലെ​ടു​ത്താ​ണ് പ​രീ​ക്ഷ​ണാ​ടി​സ്ഥാ​ന​ത്തി​ൽ പു​തി​യ പാ​ർ​ക്കി​ങ് തീ​രു​മാ​നം. ന​ഗ​ര​സ​ഭ അ​ധ്യ​ക്ഷ ക​ഴി​ഞ്ഞ ദി​വ​സം വി​ളി​ച്ചു​ചേ​ർ​ത്ത യോ​ഗ​ത്തി​ലാ​ണ് ഇ​ത് സം​ബ​ന്ധി​ച്ച തീ​രു​മാ​ന​മാ​യ​ത്. പൊ​ലീ​സും മോ​ട്ടോ​ർ വാ​ഹ​ന വ​കു​പ്പ് ഉ​ദ്യോ​ഗ​സ്ഥ​രും യോ​ഗ​ത്തി​ൽ പ​ങ്കെ​ടു​ത്തി​രു​ന്നു.