ദയ ട്രസ്​റ്റ്​ മംഗല്യദീപം പദ്ധതിയിൽ സത്യദേവിക്ക് കതിർമണ്ഡപം

കോട്ടായി: ചെറുപ്പത്തിലേ മാതാവ്​ മരിച്ചും ഇടക്കാലത്ത് പിതാവ്​ ഉപേക്ഷിച്ചും ​പോയതോടെ ഒറ്റക്കായ സത്യദേവിക്ക് കതിർമണ്ഡപമൊരുക്കി പെരിങ്ങോട്ടുകുറുശ്ശി ദയ ട്രസ്​റ്റ്​.

ട്രസ്​റ്റി​െൻറ മംഗല്യദീപം പദ്ധതിയിലാണ് കോട്ടായി നെല്ലിക്കുന്ന് മാരിയമ്മൻ ക്ഷേത്രത്തിനു സമീപം താമസിക്കുന്ന ബാബു-സരസ്വതി ദമ്പതികളുടെ മകൾ സത്യദേവിക്ക്​ മംഗല്യഭാഗ്യമൊരുക്കിയത്. ചെറുപ്പത്തിലേ അമ്മ മരിച്ചു. പിന്നീട് ആശ്രയമായ ബാബു മക്കളെ ഉപേക്ഷിച്ചു.

തലചായ്ക്കാനിടമില്ലാത്ത സത്യദേവിയും ഏക സഹോദരനും ബന്ധുക്കളുടെ സഹായത്തോടെ കഴിയുകയായിരുന്നു. ഇതിനിടെയാണ്​ 10 ദിവസം മുമ്പ് കല്ലടിക്കോട് സ്വദേശി രാജേഷ് വിവാഹാലോചനയുമായി എത്തിയത്.

എന്നാൽ, കിടപ്പാടം പോലുമില്ലാത്ത സത്യദേവിയുടെ വിവാഹം നടത്താൻ എന്തു ചെയ്യു​െമന്നറിയാതെ കുടുംബക്കാരും പ്രയാസത്തിലായി. വിവരം ദയ ട്രസ്​റ്റിന്​ മുന്നിലെത്തി. എല്ലാ സഹായവും വാഗ്​ദാനം ചെയ്​ത ട്രസ്​റ്റ്​ വിവാഹ ദിവസം കുറിക്കാനും ആവശ്യപ്പെട്ടു.

ട്രസ്​റ്റ്​ അഞ്ച്​ പവൻ സ്വർണാഭരണങ്ങളും വിവാഹ വസ്ത്രങ്ങളും വാങ്ങി നൽകി. വിവാഹസദ്യയുടെ ചെലവും ഏറ്റെടുത്തു. സത്യദേവിയെ കതിർമണ്ഡപത്തിലേക്ക് ആനയിക്കാനായതിൽ അഭിമാനമുണ്ടെന്നും ഇതിന്​ താങ്ങായി വർത്തിച്ച സുമനസ്കരുടെ സഹായത്തിന്​ നന്ദിയുണ്ടെന്നും ദയ ട്രസ്​റ്റ്​ ഭാരവാഹികൾ പറഞ്ഞു.

ചെയർമാൻ ഇ.ബി. രമേഷ്, വൈസ് ചെയർപേഴ്സൻ ഷൈനി രമേഷ്, ദയ ട്രഷറർ ശങ്കർ ജി. കോങ്ങാട്, ഉപദേശക സമിതി അംഗങ്ങളായ ദീപ ടീച്ചർ, ശോഭ ടീച്ചർ, വിവാഹ കൺവീനർ കൃഷ്ണലീല ടീച്ചർ തുടങ്ങിയവർ നേതൃത്വം നൽകി.