വന്യമൃഗ ശല്യം തടയാൻ പുതിയ ഉപകരണവുമായി മോഹൻകുമാർ

കല്ലടിക്കോട്: വന്യമൃഗങ്ങളിൽനിന്ന്​ കൃഷിയെ രക്ഷിക്കാൻ അപകട രഹിതമായി സ്ഥാപിക്കാവുന്ന ഉപകരണവുമായി ഇടക്കുർശ്ശി അജിത് എൻജിനീയറിങ് ഉടമ കെ. മോഹൻകുമാർ.

കാട്ടുമൃഗങ്ങൾ നാട്ടിലേക്ക്​ കടന്നുവരാതിരിക്കാൻ തടസ്സങ്ങൾ സൃഷ്​ടിക്കുന്നതോടൊപ്പം കൃഷിയിടത്തിലേക്ക് അതിക്രമിച്ചു കടന്നാലുടൻ അലാറമടിച്ച് ആളെ വിവരമറിയിക്കുന്ന സംവിധാനമാണ് ഒരുക്കിയിട്ടുള്ളത്. കൃഷിയിടത്തിൽ സ്ഥാപിക്കാവുന്ന കമ്പിയിൽ മൃഗങ്ങൾ വന്ന് തട്ടുകയോ വലിക്കുകയോ ചെയ്യുമ്പോഴാണ് ഉപകരണം പ്രവർത്തിക്കുക.

അപകടരഹിതമായ രീതിയിൽ ഇത് സ്ഥാപിക്കാനാവുമെന്ന്​ ധാരാളം കണ്ടുപിടിത്തങ്ങൾ നടത്തിയിട്ടുള്ള മോഹൻകുമാർ പറഞ്ഞു. ഇടക്കുറിശ്ശിയിൽ നാട്ടുകാർക്കും വനംവകുപ്പ് ജീവനക്കാർക്കും മുമ്പാകെ ഉപകരണത്തി​െൻറ പ്രവർത്തന രീതി മോഹൻകുമാർ വിശദീകരിച്ചു.