കലക്ടറേറ്റിൽ വ്യാജ ബോംബ് ഭീഷണി

പാലക്കാട്: കലക്ടറേറ്റിൽ വീണ്ടും വ്യാജ ബോംബ് ഭീഷണി. ചൊവ്വാഴ്ച രാവിലെ 11ന് ശേഷമാണ് കലക്ടറേറ്റിലേക്ക് ഇ-മെയിൽ സന്ദേശം എത്തിയത്. ഉടനെ വിവരം അറിയിച്ചതിനെ തുടർന്ന് ബോംബ് സ്ക്വാഡും ഡോഗ് സ്ക്വാഡും സ്ഥലത്തെത്തി പരിശോധന നടത്തി. കലക്ടറേറ്റിലും സിവിൽ സ്റ്റേഷനിലെ വിവിധ ഭാഗങ്ങളിലും പരിശോധന നടത്തിയെങ്കിലും സംശയാസ്പദമായി ഒന്നും കണ്ടെത്താനായില്ല. ഇതിന് മുമ്പും കലക്ടറേറ്റിൽ ബോംബ് ഭീഷണി വന്നിരുന്നു.

അന്നും പരിശോധനയിൽ ഒന്നും കണ്ടെത്താനായിരുന്നില്ല. ഏതാനും ദിവസംമുമ്പ് നഗരത്തിലെ ബാങ്കിലും സമാന സന്ദേശം ലഭിച്ചിരുന്നു. ചൊവ്വാഴ്ച ഇടുക്കിയിലും ഇത്തരത്തിൽ സന്ദേശം എത്തി. സമീപകാലത്തായി ഇത്തരം വ്യാജ സന്ദേശങ്ങൾ വർധിക്കുന്നത് ജനങ്ങളെ ആശങ്കയിലാക്കുന്നുണ്ട്.