പാലത്തുള്ളി ജലസംഭരണി നിര്‍മാണത്തിന് തുടക്കം

പുതുനഗരം: പെരുവെമ്പ് പഞ്ചായത്തിലെ പാലത്തുള്ളിയില്‍ പുതിയ ജലസംഭരണിയുടെ നിര്‍മാണ പ്രവര്‍ത്തനം ആരംഭിച്ചു. പ്രദേശത്തെ നാനൂറോളം കുടുംബങ്ങളുടെ കുടിവെള്ള പ്രശ്നത്തിന് പരിഹാരം കാണുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്.

50,000 ലിറ്റര്‍ സംഭരണശേഷിയുള്ള ജലസംഭരണിക്ക് ഗ്രാമപഞ്ചായത്ത് ഭരണസമിതി 15.79 ലക്ഷം രൂപയാണ് വകയിരുത്തിയിരിക്കുന്നത്. 2024-‘25 വാര്‍ഷിക പദ്ധതിയില്‍ ഉള്‍പ്പെടുത്തിയാണ് ജലസംഭരണിയുടെ പ്രവർത്തനങ്ങൾ നടക്കുന്നത്.

ഭാവിയില്‍ ജലച്ചോര്‍ച്ച ഉണ്ടാകാതിരിക്കാന്‍ പ്രത്യേക വാട്ടര്‍ പ്രൂഫിങ് സംവിധാനങ്ങളും നിര്‍മാണത്തിന്റെ ഭാഗമായി ഒരുക്കുന്നുണ്ട്.

ജലസംഭരണിയിൽനിന്നുള്ള പൈപ്പ് ലൈന്‍ സ്ഥാപിക്കല്‍ ഉള്‍പ്പെടെ അനുബന്ധ ജോലികള്‍ക്കായി 2025-‘26 വർഷത്തെ പദ്ധതിയില്‍ 4.79 ലക്ഷം രൂപ അധികം അനുവദിച്ചിട്ടുണ്ടെന്ന് പഞ്ചായത്ത് വൈസ് പ്രസിഡന്റ് രാജ്കുമാർ പറഞ്ഞു.