പന്നിയങ്കര ടോൾ പ്ലാസയിലെ ബാരിയർ തകർത്ത 29 ബസുകൾക്കെതിരെ കേസ്

വടക്കഞ്ചേരി: പന്നിയങ്കര ടോൾ പ്ലാസയിൽ ബാരിയർ തകർത്ത് സർവിസ് നടത്തിയ 29 ബസുകൾക്കെതിരെ കേസ്. വടക്കഞ്ചേരി -മണ്ണുത്തി ദേശീയപാത പന്നിയങ്കര ടോൾ പ്ലാസയിൽ ശനിയാഴ്ച വൈകീട്ട്​ ബാരിയറും ബാരിക്കേഡും തകർത്തതുമായി ബന്ധപ്പെട്ട് 29 സ്വകാര്യ ബസുകൾക്കെതിരെയാണ് വടക്കഞ്ചേരി പൊലീസ് കേസെടുത്തത്. സ്വകാര്യ ബസുകളിൽനിന്ന് അമിതമായി ടോൾ പിരിക്കുന്നതിനെതിരെ ബസുടമകളുടെ പ്രതിഷേധം തുടരുന്നതിനിടെയാണ് ബാരിയർ തകർത്തുള്ള സർവിസ്. ഞായറാഴ്ച രാവിലെയും 12 ബസുകൾ ഇത്തരത്തിൽ സർവിസ് നടത്തിയിരുന്നു. ടോൾ നിരക്ക് കുറക്കണമെന്നാവശ്യപ്പെട്ട് ബസുടമകളുടെ നേതൃത്വത്തിൽ ടോൾ പ്ലാസക്ക് സമീപം നടക്കുന്ന അനിശ്ചിതകാല റിലേ നിരാഹാര സമരം തുടരുകയാണ്. ഈ മാസം 12 വരെ സമരം തുടരാനാണ് തീരുമാനം. 12ന് നടക്കുന്ന ചർച്ചക്ക് ശേഷം തുടർനടപടികൾ സ്വീകരിക്കും.