ആസ്ത്മ മരുന്നിന്​ കോവിഡ്​ വൈറസിനെ പ്രതിരോധിക്കാൻ ശേഷിയുണ്ടെന്ന്​ ​പഠനം

ബംഗളൂരു ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിലെ ഗവേഷകരുടേതാണ്​ കണ്ടെത്തൽ പാലക്കാട്​: ആസ്ത്മക്കും അലർജികൾക്കും നിർദേശിക്കുന്ന യു.എസ് എഫ്​.ഡി.എ അംഗീകൃത മരുന്നായ മോണ്ടെലുകാസ്റ്റിന് കോവിഡ്​ വൈറസിനെ പ്രതിരോധിക്കാൻ ശേഷിയുണ്ടെന്ന്​ ബംഗളൂരു ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിലെ (ഐ.ഐ.എസ്​.സി) ഗവേഷകർ കണ്ടെത്തി. സിവിയർ അക്യൂട്ട് റെസ്പിറേറ്ററി സിൻഡ്രോം കൊറോണ വൈറസ്-2 (SARS-CoV-2) ഉൽപാദിപ്പിക്കുന്ന ഒരു നിർണായക പ്രോട്ടീനുമായി ബന്ധിപ്പിക്കാനും തടയാനും മോണ്ടെലുകാസ്റ്റിന്​ കഴിയുമെന്നാണ്​ കണ്ടെത്തൽ. മനുഷ്യന്‍റെ രോഗപ്രതിരോധ കോശങ്ങളിലെ വൈറൽ അനുരണനം കുറക്കാൻ ഈ മരുന്നിന്​ കഴിയും. ആസ്ത്മ, അലർജി എന്നിവയുള്ളവർക്ക്​ രണ്ടു​ പതിറ്റാണ്ടിലേറെയായി ഡോക്ടർമാർ സാധാരണ നിർദേശിക്കുന്ന മരുന്നാണ്​ മോണ്ടെലുകാസ്റ്റ്. ഗവേഷകരായ മുഹമ്മദ്​ അഫ്‌സർ, ആർ. നാരായൺ, എം.എൻ. അക്തർ, ഡി. ദാസ്, എച്ച്​. റാഹിൽ, എസ്​.കെ. നാഗരാജ്, എസ്​.എം. ഈശ്വരപ്പ, എസ്​. ത്രിപാഠി, തൻവീർ ഹുസൈൻ എന്നിവരാണ്​ പഠനം നടത്തിയത്​​. ഇ-ലൈഫ്​ -2022 മെഡിക്കൽ ജേണലിലാണ്​ കോവിഡി​നെതിരായ ആന്‍റിവൈറൽ പ്രവർത്തനം പ്രതിപാദിക്കുന്ന പഠനം പ്രസിദ്ധീകരിച്ചത്​. എൻ.എസ്​.പി-ഒന്ന്​ (Nsp1) എന്ന് വിളിക്കുന്ന കോവിഡ്​ പ്രോട്ടീനുമായി സി-ടെർമിനൽ മേഖലയിൽ മോണ്ടെലുകാസ്റ്റ് ശക്തമായി ബന്ധിക്കുന്നതായി ഗവേഷണം തെളിയിച്ചു. മനുഷ്യകോശങ്ങൾക്കുള്ളിൽ കടന്നുകയറപ്പെട്ട ആദ്യത്തെ വൈറൽ പ്രോട്ടീനുകളിൽ ഒന്നാണ് എൻ.എസ്​.പി-ഒന്ന്​. ഇത്​ ശരീരത്തിലെ പ്രോട്ടീൻ നിർമാണ യന്ത്രമായ റൈബോസോമുകളുമായി കൂടിച്ചേർന്ന്​ രോഗപ്രതിരോധ സംവിധാനത്തിന് ആവശ്യമായ സുപ്രധാന പ്രോട്ടീനുകളെ ദുർബലപ്പെടുത്തുന്നു. എൻ.എസ്​.പി-ഒന്നിനെതിരെ മോണ്ടെലുകാസ്റ്റ്​ ഉയർത്തുന്ന പ്രതിരോധം ശരീരത്തിൽ കോവിഡ്​ വൈറസ് മൂലമുണ്ടാകുന്ന നാശനഷ്ടം കുറക്കുമെന്ന്​ ​ഗവേഷകർ ചൂണ്ടിക്കാട്ടുന്നു. ഈ പ്രോട്ടീനിലെ മ്യൂട്ടേഷൻ നിരക്ക്, പ്രത്യേകിച്ച് സി-ടെർമിനൽ മേഖലയിൽ, ബാക്കിയുള്ള വൈറൽ പ്രോട്ടീനുകളെ അപേക്ഷിച്ച് വളരെ കുറവാണ്. കോവിഡ്​ വൈറസിന്‍റെ പുതിയ വകഭേദങ്ങളിലും എൻ.എസ്​.പി-ഒന്ന്​ വലിയ മാറ്റമില്ലാതെ തുടരാൻ സാധ്യതയുള്ളതിനാൽ, മോണ്ടെലുകാസ്റ്റ്​ എല്ലാ വകഭേദങ്ങൾക്കും എതിരായി പ്രവർത്തിക്കുമെന്ന് പ്രതീക്ഷിക്കുന്നതായും ഗവേഷകർ പറയുന്നു. 1600ലധികം എഫ്​.ഡി.എ -അംഗീകൃത മരുന്നുകൾ പരിശോധിച്ച ശേഷമാണ്​ എൻ.എസ്​.പി-ഒന്നുമായി ശക്തമായി ബന്ധിപ്പിക്കുന്ന മരുന്നി​നെ ഗവേഷക സംഘം വേർതിരിച്ചത്​. കെ.പി. യാസിർ