അലങ്കാര-ഔഷധച്ചെടികൾ സമൃദ്ധമായി മാത്തൂർ-ഒന്ന്​ വില്ലേജ്​ ഓഫിസ്

മാത്തൂർ: 'ക്ഷമിക്കണം! ഇത് കൃഷിഭവനല്ല, വില്ലേജ്​ ഓഫിസാണ്' -മാത്തൂർ ചുങ്കമന്ദത്തുള്ള ഒന്നാം നമ്പർ വില്ലേജ്​ ഓഫിസിലെ ജീവനക്കാർ നിത്യവും ഓഫിസിലെത്തുന്നവരോട് പറയാറുള്ളതാണിത്. വില്ലേജ്​ ഓഫിസിന്‍റെ മുൻവശം പലവിധ അലങ്കാരച്ചെടികളും ഔഷധച്ചെടികളും നിറഞ്ഞുനിൽക്കുകയാണ്. മറ്റു വശങ്ങളിൽ വാഴ, ചേമ്പ്, തക്കാളി, കാബേജ് തുടങ്ങി നാനാവിധ പച്ചക്കറി ഇനങ്ങളും കിഴങ്ങുവർഗങ്ങളും വിളഞ്ഞുനിൽക്കുകയാണ്. ഒറ്റനോട്ടത്തിൽ കാർഷിക കേന്ദ്രമെന്നോ കൃഷിഭവനോ ആണെന്ന്​ തെറ്റിദ്ധരിച്ച് പലരും ഓഫിസിൽ എത്തുമ്പോഴണ്​ വില്ലേജ്​ ഓഫിസ് അധികൃതർ ക്ഷമാപണം നടത്താറുള്ളത്. വില്ലേജ്​ ഓഫിസും പരിസരവും കാടുമൂടിയും മലിനമായും കിടക്കുന്നത് കണ്ടപ്പോൾ വില്ലേജ് ഓഫിസർ ബീനയുടെയും സഹപ്രവർത്തകരുടെയും മനസ്സിൽ തോന്നിയ ആശയമാണ് ഓഫിസിന്‍റെ മുഖച്​ഛായ തന്നെ മാറ്റിമറിച്ചത്. 51 ഇനം ഔഷധച്ചെടികൾ ഇവിടെയുണ്ട്​. വില്ലേജോഫിസിന്‍റെ നേതൃത്വത്തിൽ കൂൺകൃഷി പരിശീലനവും നൽകുന്നുണ്ട്. വില്ലേജോഫിസിൽ വിളയുന്ന ഉൽപന്നങ്ങൾ തണ്ണീരങ്കാട് സഹകരണ ബാങ്കിന് നൽകുകയാണ് പതിവ്​. വില്ലേജ് ഓഫിസ് മുറ്റവും പരിസരവും കാർഷിക-അലങ്കാര- ഔഷധച്ചെടികൾ നട്ടുപിടിപ്പിക്കാൻ മാത്തൂർ പഞ്ചായത്തിന്‍റെ എല്ലാ വിധ സഹായങ്ങളും ലഭിക്കുന്നുണ്ടെന്ന് വില്ലേജ് ഓഫിസർ ബീന പറഞ്ഞു. PE- PRY - 1: അലങ്കാര-ഔഷധച്ചെടികൾ സമൃദ്ധമായി വളർന്നുനിൽക്കുന്ന മാത്തൂർ-ഒന്ന് വില്ലേജ്​ ഓഫിസ്