ആരാധനാലയത്തെ അതിക്രമ കേന്ദ്രമാക്കുന്ന നിലപാടിനെ മതമേലധ്യക്ഷർ തള്ളണം -ബി.ജെ.പി

പാലക്കാട്​: ആരാധനാലയത്തെ അതിക്രമത്തിന്‍റെ കേന്ദ്രമാക്കി മാറ്റുന്ന എസ്‌.ഡി.പി.ഐ നിലപാടിനെതിരെ മതമേലധ്യക്ഷർ രംഗത്തുവരാത്തത്​ അത്ഭുതകരമാണെന്ന്​ ബി.ജെ.പി സംസ്ഥാന ജനറൽ സെക്രട്ടറി സി. കൃഷ്ണകുമാർ. ആർ.എസ്​.എസ്​ പ്രവർത്തകനായ എ. ശ്രീനിവാസനെ കൊലപ്പെടുത്തിയതുമായി ബന്ധപ്പെട്ട തെളിവടക്കം കണ്ടെടുത്തത്‌ ഒരു ആരാധനാലയത്തിൽനിന്നാണ്‌. കേസിൽ, ഇമാമടക്കം പ്രതിയായിട്ടും അപലപിക്കാൻ പോലും ആരും തയാറാവാത്തത്​ ജനാധിപത്യ സമൂഹത്തിന്​ ഭൂഷണമല്ലെന്നും അദ്ദേഹം പറഞ്ഞു. ശ്രീനിവാസൻ കൊലക്കേസിലെ പ്രതികളെ വെള്ളപൂശാനാണ്​​ സി.പി.എം ജില്ല സെക്രട്ടറിയുടെ ശ്രമമെന്ന്​ ബി.ജെ.പി ജില്ല അധ്യക്ഷൻ കെ.എം. ഹരിദാസ്​ ആരോപിച്ചു. സുബൈർ വധക്കേസിന്‍റെ ആസൂത്രണത്തിൽ കെ. സുരേ​ന്ദ്രന്​ പങ്കു​ണ്ടെന്ന്​ സി.പി.എം വ്യാജ ആരോപണം ഉന്നയിച്ചത്​ ഈ ഉദ്ദേശ്യത്തോടെയാണ്​. സുബൈർ വധത്തിൽ പാർട്ടി​ സംഘടന സംവിധാനങ്ങൾക്ക്​ ഒരു പങ്കുമില്ല. സഞ്ജിത്‌ കൊലപാതകത്തിന്‌ പ്രതികാരം ചെയ്യണമെങ്കിൽ ആറുമാസം ബി.ജെ.പിക്ക്‌ കാത്തിരിക്കേണ്ട ആവശ്യമില്ലെന്നും ഹരിദാസ്​ വ്യക്തമാക്കി.