കഞ്ചിക്കോട് കോച്ച് ഫാക്ടറി: വി.കെ. ശ്രീകണ്ഠനെ ചർച്ചക്ക്​ വിളിച്ച്​ റെയിൽ മന്ത്രി

ന്യൂഡൽഹി: പാലക്കാട് കഞ്ചിക്കോട് നിർദിഷ്ട ​റെയിൽവേ കോച്ച് ഫാക്ടറി സംബന്ധിച്ച് റെയിൽ മന്ത്രി അശ്വനി വൈഷ്ണവുമായി വി.കെ. ശ്രീകണ്ഠൻ എം.പി ചർച്ച നടത്തി. ലോക്​സഭയിൽ നടന്ന റെയിൽവേ ധനാഭ്യർഥന ചർച്ചയിൽ കഞ്ചിക്കോട് റെയിൽവേ കോച്ച് ഫാക്ടറി പ്രധാനമന്ത്രിയുടെ 'ഗതി ശക്തി' പദ്ധതിയിൽ ഉൾപ്പെടുത്തി നടപ്പാക്കണമെന്ന് വി.കെ. ശ്രീകണ്ഠൻ ആവശ്യപ്പെട്ടിരുന്നു. ഇതേ തുടർന്ന്​ മന്ത്രി എം.പി യെ വിളിച്ചു വരുത്തി വിഷയം ചർച്ച ചെയ്തു. 2020- ൽ റെയിൽവേ ബോർഡ് അംഗീകാരം നൽകിയ പാലക്കാട് പിറ്റ് ​ലൈൻ പദ്ധതിക്ക് ആവശ്യമായ ഫണ്ട് ഉടൻ അനുവദിക്കണമെന്ന്​ ചർച്ചയിൽ എം.പി ആവശ്യപ്പെട്ടു. കൂടാതെ, കണ്ണൂർ - എറണാകുളം ഇന്‍റർസിറ്റിക്ക്​ പട്ടാമ്പിയിലും, ബംഗളൂരു - എറണാകുളം ഇന്‍റർസിറ്റിക്ക് ഒറ്റപ്പാലത്തും സ്റ്റോപ് അനുവദിക്കുക, ഉദയ് എക്സ്പ്രസ് ഷൊർണൂരിലേക്ക് നീട്ടുക, ജയന്തി ജനത മുംബൈ - കന്യാകുമാരി പുണെയിലേക്ക് വെട്ടിച്ചുരുക്കാനുള്ള നീക്കം ഉപേക്ഷിക്കുക, പ്രഖ്യാപിച്ച മംഗളൂരു - തൂത്തുക്കുടി എക്സ്പ്രസ് ഉടൻ ആരംഭിക്കുക, പകൽ സമയം പാലക്കാട്ട് നിന്നും തിരുവനന്തപുരത്തേക്ക് ഇന്‍റർസിറ്റി എക്സ്പ്രസ് ആരംഭിക്കുക, കോവിഡ് കാലത്ത് നിർത്തിവെച്ച പാലക്കാട് ഡിവിഷന് കീഴിലെ എല്ലാ പാസഞ്ചർ ട്രെയിനുകളും പുനരാരംഭിക്കുക തുടങ്ങിയ ആവശ്യങ്ങളും മന്ത്രിയുമായുള്ള ചർച്ചയിൽ ആവശ്യപ്പെട്ടതായി എം.പി പറഞ്ഞു.