സംസ്ഥാന പാത അടച്ചിടുന്നതിൽ പ്രതിഷേധം

കൂറ്റനാട്: അറ്റകുറ്റപ്പണിക്കായി സംസ്ഥാനപാതയിൽ പട്ടാമ്പി പാലത്തിനും ഞാങ്ങാട്ടിരി പമ്പ് ജങ്​ഷനുമിടയിൽ അരകിലോമീറ്റർ അടച്ചിടുന്നതിനെതിരെ പ്രതിഷേധം. ഏപ്രിൽ ഏഴ് മുതൽ ഗതാഗതം നിരോധിച്ചതായി കഴിഞ്ഞ ദിവസം പൊതുമരാമത്ത് എക്സി. എൻജിനീയറുടെ അറിയിപ്പിൽ പറഞ്ഞിരുന്നു. കൂട്ടുപാതക്കും പട്ടാമ്പിക്കുമിടയിൽ ബസ് സർവിസ് നിലക്കുന്നതോടെ വിദ്യാർഥികളടക്കമുള്ളവരുടെ യാത്ര പ്രതിസന്ധിയിലാവുമെന്ന്​ നാട്ടുകാർ പറഞ്ഞു. കൂറ്റനാട് നിന്ന്​ പട്ടാമ്പിയിലെത്താന്‍ 25 കിലോമീറ്റർ അധികം സഞ്ചരിക്കണം. കുളപ്പുള്ളി-പാലക്കാട് റോഡ് മലേഷ്യൻ കമ്പനി നവീകരിക്കുന്ന സമയത്തും ഈയിടെ കുളപ്പുള്ളി മുതൽ ചുവന്ന ഗെയ്റ്റ് വരെ റോഡ് നവീകരിച്ചപ്പോഴും ഗതാഗതം നിരോധിച്ചിരുന്നില്ലെന്ന് നാട്ടുകാർ പറയുന്നു.