ആത്മീയ സദസ്സിന്‍റെ മറവിലെ തട്ടിപ്പുകൾക്കെതിരെ സമസ്ത-എസ്​.വൈ.എസ്​ അന്വേഷണത്തിന്​

സ്വന്തം ലേഖകൻ പാലക്കാട്​: മണ്ണാർക്കാട്​ ആര്യമ്പാവിന്​ സമീപം കൊടക്കാട്​ കേന്ദ്രീകരിച്ച്​ നടത്തുന്ന ആത്മീയ സദസ്സിന്‍റെ മറവിൽ അരങ്ങേറുന്നത്​ വൻ സാമ്പത്തിക ചൂഷണമെന്ന്​ ആരോപണം. സമൂഹമാധ്യമത്തിലൂടെ പ്രശസ്തനായ ആത്മീയ ചികിത്സകൻ നടത്തുന്ന ദുആ മജ്​ലിസുകൾക്കെതിരെ സമസ്തയുടെ മുഅല്ലിം സംഘടനയും പ്രമുഖ സമസ്ത നേതാക്കളും പരസ്യമായി രംഗത്തുവന്നു. ആൾദൈവ സങ്കൽപം സൃഷ്ടിക്കുന്ന അഭിനവ ആത്മീയ ചൂഷകരെ സമുദായം തിരിച്ചറിയണമെന്നും ആത്മീയ സദ​സ്സ്​​ എന്ന പേരിൽ ഇത്തരം ആളുകൾ സംഘടിപ്പിക്കുന്ന പരിപാടികളിൽനിന്ന്​ വിട്ടുനിൽക്കണമെന്നും സമസ്ത കേരള ജംഇയ്യതുൽ മുഅല്ലിമീൻ സെൻട്രൽ കൗൺസിൽ നിർവാഹക സമിതി ആവശ്യപ്പെട്ടു. മലേഷ്യൻ സന്ദർശനത്തിനുശേഷം സ്വയം ജമലുലൈലി എന്നു പരിചയപ്പെടുത്തിയാണ്​ 45കാരൻ യുട്യൂബിലൂടെ ​ആത്മീയ സദസ്സുകൾ സംഘടിപ്പിച്ചുതുടങ്ങിയത്​. കോവിഡ്​ കാലത്ത്​ഇയാളുടെ പ്രഭാഷണത്തിലും ​പ്രാർഥനയിലും ആകൃഷ്ടരായവർ വാട്​സ്​ആപ് ഗ്രൂപ്പുകൾ ഉണ്ടാക്കി കൂടുതൽ ആളുകളിലേക്ക്​ ഇദ്ദേഹ​ത്തെ പരിചയപ്പെടുത്തി. വിവിധ ​ജില്ലകളിൽ സ്ത്രീകൾ ഉ​ൾപ്പെടെ അഡ്​മിനുകളായ വാട്​സ്​ആപ് ഗ്രൂപ്പുകൾ രൂപപ്പെട്ടു. നൂറുകണക്കിന്​ സ്ത്രീകളാണ്​ ഇങ്ങനെ ആത്മീയ ചികിത്സകന്‍റെ അനുയായികളായി മാറിയത്​. കഴിഞ്ഞ ദിവസങ്ങളിൽ ഇയാൾ കൊടക്കാടും കരിങ്കല്ലത്താണിയിലുമായി സംഘടിപ്പിച്ച പ്രാർഥന സദസ്സുകളിലേക്ക്​ വിവിധ ജില്ലകളിൽനിന്ന്​ എത്തിച്ചേർന്നത്​ ആയിരങ്ങളാണ്​. ടൂറിസ്റ്റ്​ ബസുകളിലും മറ്റു വാഹനങ്ങളിലുമാണ്​ ആളുകൾ എത്തിയത്​. വിപുലമായ സൗകര്യം ഒരുക്കിയായിരുന്നു പരിപാടി. അനാഥകൾ​ക്ക്​ എന്ന പേരിൽ വൻതോതിൽ പണം പിരിക്കുന്നുണ്ട്​. തേൻ അടക്കം നൽകിയുള്ള ആത്മീയ ചികിത്സയുടെ മറവിൽ വൻ സാമ്പത്തിക തട്ടിപ്പും അരങ്ങേറുന്നു. സ്ത്രീകളാണ്​ അധികവും ചൂഷണത്തിൽ അകപ്പെടുന്നത്​. കഴിഞ്ഞ ദിവസം കരിങ്കല്ലത്താണിയിൽ നടന്ന പ്രാർഥന മജ്​ലിസിൽ പ്രമുഖ സമസ്ത നേതാവ്​ വരുകയും ചില സുന്നി നേതാക്കൾ ഇതിന്‍റെ സംഘാടകരാവുകയും ചെയ്തതോടെയാണ്​ വിഷയം സമസ്തയിൽ ഗൗരവമുള്ള ചർച്ചയായത്​. ഇത്തരം അനാചാര മൂർത്തികൾക്കെതിരെ സമസ്ത പണ്ഡിതർ പ്രതികരിക്കുമെന്ന്​ പ്രത്യാശിക്കുന്നതായി കോഴിക്കോട്​ വലിയ ഖാദി മുഹമ്മദ്​ കോയ തങ്ങൾ ജമലുല്ലൈലി ഫേസ്​ബുക്കിൽ കുറിച്ചു. മതമേഖലയിൽ പ്രവർത്തിക്കുന്നവർ മതനിയമം പാലിക്കണമെന്നും മതത്തിന്‍റെ മേലങ്കിയണിഞ്ഞ്​ ആഭാസത്തിന്​ നേതൃത്വം നൽകിയാൽ പിടിച്ചുകെട്ടേണ്ടിവരുമെന്നും സമസ്ത നേതാവ്​ സത്താർ പന്തല്ലൂർ പ്രതികരിച്ചു. വ്യക്തികളാൽ നയിക്കപ്പെടുന്ന ആത്മീയ സദസ്സുകളെക്കുറിച്ചുള്ള ചർച്ചകളുടെ വെളിച്ചത്തിൽ ഇത്തരം കേന്ദ്രങ്ങളെക്കുറിച്ച്​ പഠനം നടത്തി സമസ്തക്ക്​ റിപ്പോർട്ട്​ നൽകാൻ എസ്​​.വൈ.എസ്​ സംസ്ഥാന കമ്മിറ്റി തീരുമാനിച്ചതായി എസ്​.വൈ.എസ്​ നേതാവ്​ നാസർ ഫൈസി കൂടത്തായി അറിയിച്ചു.