ജനകീയ പ്രതിരോധങ്ങളെ ഇകഴ്ത്തിക്കാണിക്കുന്നത്​ ഭരണകൂട ദാസ്യം -​സ്പീക്കർ

പാലക്കാട്​: വിലക്കയറ്റവും കുത്തകകൾക്കായി നിർമിച്ച തൊഴിൽ നിയമങ്ങളും ജനജീവിതത്തിന്​ വെല്ലുവിളിയാവുമ്പോൾ നിശബ്​ദത പാലിക്കുകയും അതിനെതിരെ ഉയർന്നുവരുന്ന ജനകീയ പ്രതിരോധങ്ങളെ താഴ്ത്തിക്കെട്ടാൻ മുന്നിട്ടിറങ്ങുകയും ചെയ്യുന്നത്​ ഭരണകൂട ദാസ്യമാണെന്ന്​ സ്പീക്കർ എം.ബി. രാജേഷ്​. പണിമുടക്കാനുള്ള തൊഴിലാളികളുടെ അവകാശം ജനാധിപത്യത്തിന്‍റെ ഭാഗമാണ്‌. ലോകമെങ്ങും പണിമുടക്കുകൾ ജനാധിപത്യത്തിൽ അംഗീകരിക്കപ്പെട്ട പ്രതികരണമാണ്‌. മിന്നൽ പണിമുടക്കല്ല, മാസങ്ങളോളം ചർച്ചക്ക്​ വിധേയമാക്കി തീരുമാനിച്ചതാണ്​ കഴിഞ്ഞ ദിവസങ്ങളിലെ പണിമുടക്ക്​. ചൂഷണങ്ങൾക്കെതിരെ പ്രതികരിക്കുമ്പോഴുണ്ടാകുന്ന ചില അസൗകര്യങ്ങൾ പെരുപ്പിച്ചുകാണിക്കുന്നത്​ ആശാസ്യമായ നടപടിയല്ല. മാധ്യമങ്ങളടക്കം ഇപ്പോൾ പണിമുടക്കിനെ കുറ്റപ്പെടുത്തുന്നവർ നാളെ പശ്ചാത്തപിക്കേണ്ടിവരുമെന്നും എം.ബി. രാജേഷ് പ്രസ്​താവനയിൽ പറഞ്ഞു.