കൂർമ്പാച്ചി മലയിലെ രക്ഷാദൗത്യം: ജില്ല ഫയർ ഓഫിസർക്ക്​ കാരണംകാണിക്കൽ നോട്ടീസ്​

വീഴ്​ച വന്നതായി അഗ്​നിരക്ഷ സേന ഉദ്യോഗസ്ഥരുടെ വാട്​സ്​ആപ് സന്ദേശവും പുറത്ത്​ പാലക്കാട്​: മലമ്പുഴ കൂർമ്പാച്ചി മലയിൽ രക്ഷാദൗത്യത്തിൽ അഗ്നിരക്ഷ സേനക്ക്​ വീഴ്ചയുണ്ടായെന്ന വിലയിരുത്തലിനെ തുടർന്ന്​ പാലക്കാട്​ ജില്ല അഗ്നിരക്ഷ ഓഫിസർ വി.കെ. ഋതീജിന്​, ഫയർ ആൻഡ്​​ റെസ്ക്യൂ ഡയറക്ടർ ജനറൽ കാരണംകാണിക്കൽ നോട്ടീസ്​ നൽകി. രണ്ട്​ ദിവസത്തിനകം മറുപടി നൽകാനാണ്​​ നിർദേശം. വെള്ളവും ഭക്ഷണവും കിട്ടാതെ, മലമ്പുഴ ചെറാട്​ സ്വദേശി ബാബു മലയിടുക്കിൽ കുടുങ്ങിയ വിവരം ഉന്നത ഉദ്യോഗസ്ഥ​രെ അറിയിക്കുകയോ അടിയന്തര നടപടികൾ എടുക്കുകയോ ചെയ്തില്ലെന്ന്​ നോട്ടീസിൽ പറയുന്നു. മാധ്യമങ്ങളിലൂടെയാണ്​ പ്രശ്​നത്തിന്‍റെ ഗൗരവം മേലധികാരികൾ അറിയുന്നത്​. ആവശ്യമായ ജീവനക്കാരെ നിയോഗിക്കാനോ സാങ്കേതിക സഹായം നൽകാനോ ജില്ല ഫയർ ഓഫിസറുടെ ഭാഗത്തുനിന്ന്​ നടപടിയുണ്ടായില്ല. ഏകോപനത്തിന്‍റെ അഭാവമാണ്​ രക്ഷപ്രവർത്തനത്തിന്​ തടസ്സമായതെന്നും അധികൃതർ പറയുന്നു. ഇതിനിടെ, രക്ഷപ്രവർത്തനത്തിലെ വീഴ്ച സംബന്ധിച്ച്​ അഗ്നിരക്ഷസേന ഉദ്യോഗസ്ഥരുടെ വാട്​സ്​ആപ് സന്ദേശവും പുറത്തുവന്നു. രക്ഷപ്രവർത്തനത്തിൽ ഫയർഫോഴ്സിന് അടിമുടി പോരായ്മ ഉണ്ടായെന്ന് വ്യക്തമാക്കുന്നതാണ് സന്ദേശം. വിദഗ്ധ പരിശീലനം നേടിയ ഇടുക്കിയിൽനിന്നുള്ള പത്തംഗ സംഘം രാത്രി ചെറാട്ടെത്തിയെങ്കിലും മല കയറാൻ പൊലീസി​ന്‍റെ അനുവാദം തേടേണ്ട അവസ്ഥ വരെയുണ്ടായെന്ന് ഉദ്യോ​ഗസ്ഥർ പറയുന്നു. ഫയർഫോഴ്​സ് ഉദ്യോഗസ്ഥരുടെ വാഹനം പൊലീസ് തടഞ്ഞിടുന്ന അവസ്ഥപോലും ഉണ്ടായി. കലക്ടറുടെ അനുമതിയോടെയാണ് മല കയറിയത്. മലയിൽ ആർമി, എൻ.ഡി.ആർ.എഫ്, പൊലീസ്, ഫോറസ്റ്റ് എന്നിവർക്കൊപ്പം ഒരു ഫയർ ഓഫിസർ പോലും ഉണ്ടായിരുന്നില്ലെന്നും വാട്​സ്​ആപ് സന്ദേശത്തില്‍ പറയുന്നു. ബാബുവിന്‍റെ 50 മീറ്റർ അടുത്തുവരെ അഗ്​നിരക്ഷ സംഘം എത്തിയിരുന്നു. വ്യക്തമായ ഏകോപനമുണ്ടായിരുന്നെങ്കിൽ സേനക്ക്​ രക്ഷപ്രവർത്തനം നടത്താമായിരുന്നു. പാലക്കാട് ഫയർ ഓഫിസർ വീട്ടിൽ പോയിട്ടുണ്ടാകുമെന്നും വാട്​സ്​ആപ് സന്ദേശത്തിൽ പരിഹാസമുണ്ട്​. ബാബു കുടുങ്ങിപ്പോയ തിങ്കളാഴ്ച തുടങ്ങിയ രക്ഷപ്രവര്‍ത്തനം ബുധനാഴ്ച ഉച്ചയോടെയാണ്​ അവസാനിച്ചത്. രണ്ട് ദിവസത്തെ ആശുപത്രി വാസത്തിന് ശേഷം വെള്ളിയാഴ്ചയാണ് ബാബുവിനെ വീട്ടിലെത്തിച്ചത്. രക്ഷപ്രവർത്തനത്തിന്​ സംസ്ഥാന സർക്കാറിന്​ 75 ലക്ഷത്തോളം രൂപ ചെലവ്​ വന്നെന്നാണ്​ ജില്ല ഭരണകൂടം കണക്കാക്കുന്നത്​.