വാൽപ്പാറ പ്രധാന റോഡിൽ കാട്ടാനകളും കടുവയും; മുന്നറിയിപ്പുമായി വനംവകുപ്പ്

പൊള്ളാച്ചി: വാൽപ്പാറ പ്രധാന റോഡിൽ കാട്ടാനയുടെയും കടുവയുടെയും സാന്നിധ്യം സ്ഥിരീകരിച്ചതോടെ​ മുന്നറിയിപ്പുമായി വനംവകുപ്പ്​. പ്രധാന റോഡിൽ കവർക്കൽ എന്ന സ്ഥലത്ത്​ പ്രധാന റോഡിലൂടെ കഴിഞ്ഞ ദിവസം പുലർച്ചെ കടുവ നടന്നുനീങ്ങിയ വീഡിയോ വിനോദസഞ്ചാരി മൊബൈലിൽ ചിത്രീകരിച്ചിരുന്നു. വീഡിയോ സാമൂഹിക മാധ്യമങ്ങൾ വഴി പ്രചരിച്ചതിനെ തുടർന്നാണ് വനംവകുപ്പ്​ വിവരം സ്ഥിരീകരിച്ച്​ മുന്നറിയിപ്പ്​ നൽകിയത്​. ആളിയാറിൽ നിന്ന്​ രണ്ട്​ കിലോമീറ്റർ പരിധിയിൽ കഴിഞ്ഞ ഒരാഴ്ച്ചയായി രണ്ട് ആനകൾ റോഡിലിറങ്ങുന്നത്​ പതിവായിട്ടുണ്ട്​. ആളിയാർ മുതൽ വാൽപ്പാറ വരെയുള്ള പ്രദേശങ്ങൾക്കിടയിൽ വിനോദസഞ്ചാരികൾ വാഹനങ്ങൾ നിർത്തരുതെന്നും ഭക്ഷണം കഴിക്കരുതെന്നുമാണ്​ നിർദേശം. വന്യജീവികളെ ചിത്രീകരിക്കുന്നതും വിലക്കിയിട്ടുണ്ട്​. PEW-KLGD വാൽപ്പാറ പ്രധാന റോഡിൽ കണ്ടെത്തിയ കടുവയും ആനയും