ഉദ്ഘാടനം കഴിഞ്ഞ മങ്കര കോട്ടയിലെ പകൽവീട് നോക്കുകുത്തി

വൈദ്യുതി കണക്‌ഷൻ ഇല്ലാതെയാണ് ഉദ്ഘാടനം ചെയ്തത് മങ്കര: കൊട്ടിഘോഷിച്ച്‌ ഉദ്ഘാടനം നടത്തിയ മങ്കര കോട്ടയിലെ പകൽവീട് ഒന്നര വർഷം പിന്നിട്ടിട്ടും തുറന്ന് പ്രവർത്തിക്കാനായില്ല. കെട്ടിടവും പരിസരവും കാടുമൂടി ഇഴജന്തുക്കളുടേയും സാമൂഹികവിരുദ്ധരുടേയും താവളവുമായി. 2019-20 വർഷത്തെ വികസന ഫണ്ട് ഉപയോഗിച്ചാണ് സി.പി.എം ഭരണസമതി പദ്ധതി പൂർത്തീകരിച്ചത്. ലക്ഷങ്ങൾ മുടക്കി നിർമിച്ചതല്ലാതെ ഒരു പ്രയോജനവും ഇല്ലാതെ നോക്കുകുത്തിയായി നിൽപ്പാണ്​ കെട്ടിടമെന്ന്​ നാട്ടുകാർ പറയുന്നു. വൈദ്യുതി കണക്‌ഷൻ ഇല്ലാതെയാണ് ഉദ്ഘാടനം നടന്നത്. നിർധനരായ വയോജനങ്ങൾക്ക് ഇരിക്കാനും സമയം ചെലവഴിക്കാനുമായിട്ടാണ് പകൽ വീട് സ്ഥാപിച്ചത്. ഈ മാസം തന്നെ തുറന്നു പ്രവർത്തിക്കാൻ നടപടിയെടുക്കുമെന്നും സായം പ്രഭ പദ്ധതിയിലുൾപ്പെടുത്തി ഇതിലേക്ക് വേണ്ട ഉപകരണങ്ങൾ ഉടൻ നൽകി പ്രവർത്തന യോഗ്യമാക്കുമെന്നും പ്രസിഡന്റ് എം.എൻ. ഗോകുൽദാസ് 'മാധ്യമത്തോട് പറഞ്ഞു. ഉടൻ വൈദ്യുതി എത്തിക്കാനും നടപടി തുടങ്ങുമെന്നും അറിയിച്ചു. PE WPTPL 1 ഉദ്ഘാടനം കഴിഞ്ഞ് ഒന്നര വർഷമായിട്ടും പ്രവർത്തിക്കാത്ത മങ്കരയിലെ പകൽവീട്