കോവിഡ്​ ധനസഹായം: സർട്ടിഫിക്കറ്റുകൾക്കായി​ ഓഫിസുകൾ കയറിയിറങ്ങി ആശ്രിതർ

മലപ്പുറം: കോവിഡ് മൂലം മരിച്ചവരുടെ ആശ്രിതർക്ക്​​ ധനസഹായം ലഭിക്കാൻ​ അപേക്ഷയോടൊപ്പം ആവശ്യമായ പ്രധാനരേഖ മരണ സർട്ടിഫിക്കറ്റെന്ന്​ സർക്കാർ അറിയിച്ചതോടെ രേഖകൾക്കായി​ ആശുപത്രികൾ കയറിയിറങ്ങുകയാണ്​ ബന്ധുക്കൾ.​ മരിച്ചയാളുടെ അടുത്ത ബന്ധുവിന്​ സർക്കാർ പ്രഖ്യാപിച്ചത്​ 50,000 രൂപയാണ്​. കൂടാതെ ദാരിദ്ര്യരേഖക്ക്​ താഴെയുള്ളവർക്ക്​ 5000 രൂപ വീതം 36 മാസവും ലഭിക്കും. മരിച്ചയാളുടെ സർട്ടിഫിക്കറ്റ്​, അപേക്ഷകന്‍റെ റേഷൻ കാർഡ്​, ആധാർ കാർഡ്​, ബാങ്ക് പാസ്​ ബുക്ക്​ എന്നിവയുടെ പകർപ്പുകൾ​ റിലീഫ്​ കേരള എന്ന വെബ്​സൈറ്റുകളിലൂടെയും അക്ഷയ കേന്ദ്രങ്ങൾ വഴിയും വില്ലേജ്​ ഓഫിസുകളിൽ നേരിട്ടും സമർപ്പിക്കാമെന്നാണ്​ പത്രപരസ്യത്തിൽ പറയുന്നത്​. കോഴിക്കോട്​ മെഡിക്കൽ കോളജ്​ ആശുപത്രിയിൽ മരിച്ച മലപ്പുറം സ്വദേശിയുടെ മകൻ​ കഴിഞ്ഞ നവംബറിൽ സാക്ഷ്യപത്രത്തിന്​ അപേക്ഷിച്ചിട്ടുണ്ടെങ്കിലും ഇതുവരെ തയാറായി​ട്ടില്ലെന്നാണ്​ അധികൃതർ പറയുന്നത്​. കൊലപാതകം, ആത്മഹത്യ, അപകടം സംഭവിച്ചുള്ള മരണങ്ങൾ ഒഴികെ കോവിഡ്​ ബാധിച്ച്​ ഒരുമാസത്തിനുള്ളിൽ മരിച്ചാൽ കോവിഡ്​ മരണമായി കണക്കാക്കണമെന്ന്​ സുപ്രീംകോടതി വിധിയുണ്ട്​. പോസിറ്റിവായ തീയതിയും മരണം സംഭവിച്ച തീയതിയും ഒത്തുനോക്കിയാൽതന്നെ ഇക്കാര്യം തീരുമാനിക്കാമെന്നിരിക്കേയാണ്​​ സർട്ടിഫിക്കറ്റുകളുടെ പേരിൽ ആശ്രിതരെ വട്ടംകറക്കുന്നത്​. തദ്ദേശ സ്ഥാപനങ്ങളിൽനിന്ന്​ മരണ സർട്ടിഫിക്കറ്റ്​ ലഭിക്കാൻ രണ്ടാഴ്ചക്കു​ മുകളിൽ സമയമെടുക്കും. തുടർന്ന്​ ഡെത്ത്​ ഇൻഫർമേഷൻ പോർട്ടലിൽ ഇവ രേഖപ്പെടുത്തണം. ഈ പോർട്ടലിലെ ലിസ്റ്റിൽ ഉൾപ്പെട്ടാലും സാക്ഷ്യപത്രം ലഭിക്കാൻ മരണം സംഭവിച്ച​ ആശുപത്രിക​ളെ ബന്ധപ്പെടണം. ഇൗ ലിസ്റ്റിൽ ഉൾപ്പെട്ടിട്ടില്ലെങ്കിൽ അപ്പീൽ നൽകണം. എല്ലാ നടപടിക്രമങ്ങളും പൂർത്തിയായാൽ അപ്പീൽ നൽകിയവരുടെ അപേക്ഷ ഡി.എം.ഒ ഓഫിസിലേക്ക്​ അയക്കും. ഡി.എം.ഒ ഉൾപ്പെടുന്ന സമിതിയാണ്​ മരണസാക്ഷ്യപത്രം അനുവദിക്കുന്നത്​​. തുടർന്ന്​ റവന്യൂ വകുപ്പാണ്​ ധനസഹായം അനുവദിക്കുന്നത്​. ​കെ.എം.എം. അസ്​ലം