ഉദ്യോഗസ്ഥ ക്ഷാമം; വലഞ്ഞ് തച്ചനാട്ടുകര

തച്ചനാട്ടുകര: ഉദ്യോഗസ്ഥ ക്ഷാമത്തിൽ വലഞ്ഞ് തച്ചനാട്ടുകര. ഇതോടെ പദ്ധതി പ്രവർത്തനങ്ങളെല്ലാം അവതാളത്തിലായ നിലയിലാണ്​. മേഖലയിൽ ഒന്നരവർഷമായി കൃഷി ഓഫിസറില്ല. മണ്ണാർക്കാട് മുനിസിപ്പാലിറ്റിയിലെ കൃഷി ഓഫിസർക്കാണ് തച്ചനാട്ടുകര ഗ്രാമപഞ്ചായത്ത് കൃഷി ഓഫിസിലെ അധിക ചുമതല. ഒരുവർഷമായി എൻജിനീയറില്ല. വെറ്ററിനറി ഡോക്ടർ സ്ഥലം മാറിപ്പോയി. രണ്ടുമാസത്തോളമായി ഇവിടെ വെറ്ററിനറി ഡോക്ടറില്ല. ലൈവ് സ്​റ്റോക്ക് ഇൻസ്പെക്ടർ അധികച്ചുമതലയിൽ മണ്ണാർക്കാടാണ് പ്രവർത്തിക്കുന്നത്. ഒരു സ്ഥിരം ഓവർസിയർ മാത്രമാണുള്ളത്. ഒഴിവുകൾ ഉടൻ നികത്തണം എന്ന് ആവശ്യപ്പെട്ടുകൊണ്ട് ഗ്രാമപഞ്ചായത്ത് പ്രസിഡൻറ്​ കെ.പി.എം. സലീം ബന്ധപ്പെട്ട അധികാരികൾക്ക് നിവേദനം നൽകി.