ആനവണ്ടിയിൽ നെല്ലിയാമ്പതിയിലേക്ക് ഉല്ലാസയാത്ര പോകാം

പാലക്കാട്: മഞ്ഞും, കുളിരും, മഴയും നുണഞ്ഞ് കാനനഭംഗി ആസ്വദിച്ച് നെല്ലിയാമ്പതിയിലേക്ക്​ ഉല്ലാസയാത്രക്ക്​ കെ.എസ്​.ആർ.ടി.സി അവസരമൊരുക്കുന്നു. നവംബര്‍ 14 നാണ് പാലക്കാട് - നെല്ലിയാമ്പതി ഉല്ലാസയാത്ര ആരംഭിക്കുക. വരയാടുമല, സീതാര്‍കുണ്ട്, കേശവന്‍ പാറ വ്യൂ പോയൻറുകള്‍, ഗവ. ഓറഞ്ചു ഫാം, പോത്തുപാറ ടീ എസ്​റ്റേറ്റ്, പോത്തുണ്ടി ഡാം എന്നിവിടങ്ങൾ യാത്രയിൽ കാണാനാകും. ഒരു സർവിസിൽ 35 പേരാണ്​ ഉണ്ടാവുക. 600 രൂപയാണ് ഒരാൾക്ക്​ ചാര്‍ജ്. പ്രഭാത ഭക്ഷണം, ഉച്ചയൂണ്, വൈകീട്ടുള്ള ചായ, ലഘുഭക്ഷണം എന്നിവയും ഇതിലുള്‍പ്പെടും. രാവിലെ ഏഴിന് പാലക്കാട് കെ.എസ്.ആര്‍.ടി.സി ഡിപ്പോയില്‍ നിന്നാരംഭിക്കുന്ന യാത്ര രാത്രി എട്ടോടെ തിരിച്ചെത്തുന്ന വിധത്തിലാണ് ക്രമീകരിച്ചിരിക്കുന്നത്. കൂടുതല്‍ വിവരങ്ങള്‍ക്ക് ഫോൺ: 9495450394, 9947086128, 9249593579.