കടുവ സെൻസസ്: പ്രാരംഭ നടപടികൾ തുടങ്ങി

പറമ്പിക്കുളം: കടുവകളുടെ സെൻസസി​ൻെറ പ്രാഥമിക നടപടികൾക്ക്​ തുടക്കമായി. നാല് വർഷത്തെ ഇടവേളക്കുശേഷമാണ്​ സംസ്ഥാനത്ത് കടുവ സെൻസസ് നടത്തുന്നത്​. പറമ്പിക്കുളത്ത് പരിശീലനം പൂർത്തീകരിച്ച വനംവകുപ്പ് ഉദ്യോഗസ്ഥർ വയനാട് വന്യജീവി സങ്കേതത്തിലാണ്​ പദ്ധതിക്ക്​ തുടക്കം കുറിച്ചത്. സെൻസസിൻെറ ഭാഗമായി 201 കാമറ ട്രാപ്പുകളാണ് വയനാട്ടിൽ ഉപയോഗിക്കുക. തുടർന്ന്​ ഇതേ കാമറകൾ പറമ്പിക്കുളത്തും സെൻസസി​ന്​ ഉപയോഗിക്കുമെന്ന്​ വയനാട് വൈൽഡ് ലൈഫ് വാർഡൻ നരേന്ദ്രദാസ് പറഞ്ഞു. കാമറ ട്രാപ്പുകൾക്കൊപ്പം ഇത്തവണ ജി.പി.എസ് സാങ്കേതിക വിദ്യയിൽ പ്രവർത്തിക്കുന്ന എം. സ്​ട്രിപ്​സ്​ മൊബൈൽ ആപ്പും സെൻസസിന് ഉപയോഗപ്പെടുത്തും. ഇതിനായി കണ്ണൂർ, വയനാട്, മലപ്പുറം, പാലക്കാട്, തൃശൂർ, ഇടുക്കി, പത്തനംതിട്ട ജില്ലകളിലെ വന്യജീവി സങ്കേതത്തിലെ വനംവകുപ്പ്​ ജീവനക്കാരുടെ​ പരിശീലനം ഇൗയാഴ്​ചയിൽ തന്നെ പൂർത്തിയാകുമെന്ന്​​ അധികൃതർ അറിയിച്ചു. പറമ്പിക്കുളം, സൈലൻറ് വാലി, നിലമ്പൂർ, വയനാട് എന്നിവിടങ്ങളിൽ ഇതിനകം പരിശീലനം പൂർത്തിയായിട്ടുണ്ട്​. ഡിസംബറിന് മുമ്പ് നാഷനൽ ടൈഗർ കൺസർവേഷൻ അതോറിറ്റിക്ക് സെൻസസ്​ റിപ്പോർട്ട് കൈമാറും. വയനാട് വന്യജീവി സങ്കേതത്തിൽ 312 കാമറകളാണ് 2018ൽ സെൻസസിനായി സ്ഥാപിച്ചിരുന്നത്. ഇതിൽ കടുവകളുടെ 1380 ദൃശ്യങ്ങൾ പതിഞ്ഞിരുന്നു. നിലവിൽ 120 കടുവകൾ ഈ മേഖലയിലുണ്ടെന്ന് വയനാട് വൈൽഡ് ലൈഫ് വാർഡൻ പറഞ്ഞു. പറമ്പിക്കുളം കടുവ സങ്കേതത്തിൻ 254 കാമറകൾ സ്ഥാപിച്ചതിൽ 468 കടുവകളുടെ ദൃശ്യങ്ങൾ ലഭിച്ചു. 27 കടുവകൾ ഇവിടെയുണ്ടെന്നാണ്​ കണക്ക്​. പെരിയാർ കടുവ സങ്കേതത്തിൽ 390 കാമറകളിലായി 498 കടുവകളുടെ ദൃശ്യങ്ങൾ പതിഞ്ഞു. 26 കടുവകളെയാണ്​ കണ്ടെത്തിയത്​. സൈലൻറ് വാലിയിൽ 103 കാമറകളിലായി പതിഞ്ഞ 48 കടുവകളുടെ ദൃശ്യങ്ങളിൽനിന്ന്​ ഏഴ്​ കടുവകളെ കണ്ടെത്തിയിരുന്നു. പറമ്പിക്കുളം കടുവാസങ്കേതത്തിൽ വരുംദിവസങ്ങളിൽ സെൻസസ് പ്രവർത്തനങ്ങൾ ആരംഭിക്കുമെന്നും ഉദ്യോഗസ്ഥർ സജ്ജരാണെന്നും പറമ്പിക്കുളം കടുവാസങ്കേതം ഡെപ്യൂട്ടി ഡയറക്ടർ വൈശാഖ് ശശികുമാർ പറഞ്ഞു.