വനം വകുപ്പിന്‍റെ കേസ് വേഗത്തിലാക്കണമെന്ന്​ അമ്മ

മണ്ണാർക്കാട്: മധു വധക്കേസിലെ പ്രതികൾക്കെതിരെ വനം നിയമപ്രകാരമെടുത്ത കേസ് വേഗത്തിൽ തീർപ്പാക്കണമെന്നാവശ്യപ്പെട്ട് മധുവിന്‍റെ അമ്മ മല്ലി ഡയറക്ടർ ജനറൽ ഓഫ് പ്രോസിക്യൂഷനെ നേരിൽ കണ്ട്​ പരാതി​ നൽകി. മകന്‍റെ കൊലപാതകവുമായി ബന്ധപ്പെട്ട കേസ് മണ്ണാർക്കാട് സ്പെഷൽ കോടതിയിൽ നടക്കുന്നുണ്ടെന്ന്​ അവർ പരാതിയിൽ ചൂണ്ടിക്കാട്ടി. പ്രതികൾ മധുവിനെ പിടിച്ചുകൊണ്ടുവന്നത് സംരക്ഷിത വനമേഖലയിലെ അഞ്ചുമുടി മലയുടെ അടിവാരത്തെ ഗുഹയിൽനിന്നാണ്​. വനത്തിൽ അതിക്രമിച്ച്​ കയറിയതിന്​ പ്രതികൾക്കെതിരെ വനം വകുപ്പ് നൽകിയ കേസിൽ മണ്ണാർക്കാട് മജിസ്ട്രേറ്റ് കോടതിയിൽ വിചാരണ നടക്കുന്നുണ്ടെങ്കിലും ആവശ്യമായ പരിഗണന ലഭിക്കുന്നില്ലെന്ന സംശയമുണ്ട്​ -അവർ പറഞ്ഞു.