ആലത്തൂർ ബൈപാസിന്​ ഭരണാനുമതിയായി

ആലത്തൂർ: താലൂക്ക്​ ആസ്ഥാനത്തെ ഗതാഗതക്കുരുക്ക് ഒഴിവാക്കാൻ ലക്ഷ്യമിടുന്ന ബൈപാസിന്​ ഭരണാനുമതിയായി. ദേശീയപാതയേയും കോർട്ട് റോഡിനേയും ബന്ധിപ്പിക്കുന്ന വാനൂർ റോഡിലെ തോട്ടുപാലത്തിൽനിന്ന് ആരംഭിച്ച് താലൂക്ക്​ ആശുപത്രിക്ക് പിന്നിലൂടെ റെസ്റ്റ് ഹൗസിന് കിഴക്ക് ഭാഗം ആലത്തൂർ ബസാർ റോഡിലെ തോട്ടുപാലത്തിൽ അവസാനിക്കുന്ന വിധമാണ് റോഡ് നിർമിക്കുക. ഇതിനായി സമർപ്പിച്ച 15 കോടിയുടെ പദ്ധതിക്കാണ് ഭരണാനുമതി ലഭിച്ചത്. 2017ലെ ബജറ്റിലാണ് പദ്ധതിക്ക് അനുമതി നൽകിയത്. തോടിന്‍റെ വശങ്ങൾ കെട്ടി സംരക്ഷിച്ച് മുകൾ ഭാഗത്ത് സ്ലാബിട്ടാണ് റോഡ് നിർമിക്കുക. കിഫ്ബിയാണ് ഫണ്ട് അനുവദിക്കുക. സ്ഥലം തദ്ദേശഭരണ വകുപ്പിന്‍റെ അധീനതയിലായതിനാൽ നിർമാണ ചുമതലയും അതിലെ എൻജിനീയറിങ്​ വിഭാഗത്തിനാണ് നൽകിയിട്ടുള്ളത്. സാങ്കേതിക അനുമതിയും ടെൻഡർ നടപടികളും പൂർത്തിയാകുന്നതിനനുസരിച്ച് നിർമാണം തുടങ്ങും.