നിറമില്ലെന്നും സൗന്ദര്യമില്ലെന്നും പറഞ്ഞ് ഭർത്താവ് ഉപദ്രവിച്ചു; മലപ്പുറത്ത് യുവതി ജീവനൊടുക്കിയത് സ്ത്രീധന പീഡനം മൂലമെന്ന് കുടുംബം

മലപ്പുറം: എളങ്കൂരിൽ യുവതിയെ ഭർതൃാവീട്ടിൽ മരിച്ചനിലയിൽ കണ്ടെത്തിയ സംഭവം സ്ത്രീധന പീഡനമെന്ന് കുടുംബം. കഴിഞ്ഞ വ്യാഴാഴ്ചയാണ് പൂക്കോട്ടുപാടം സ്വദേശിയായ വിഷ്ണുജയെ(25) മരിച്ച നിലയിൽ കണ്ടെത്തിയത്. വിഷ്ണുജയെ ഭർത്താവ് പ്രഭിൻ ഉപദ്രവിച്ചിരുന്നതായി കുടുംബം ആരോപിച്ചു. സംഭവത്തിൽ ഭർത്താവ് പ്രഭിനെ പൊലീസ് കസ്റ്റഡിയിലെടുത്തു.

സ്ത്രീധനത്തിന്റെയും സൗന്ദര്യത്തിന്റെയും പേരിൽ ഭർത്താവ് വിഷ്ണുജയെ നിരന്തരം ഉപദ്രവിച്ചിരുന്നുവെന്നാണ് പരാതി. 2023 മേയിലായിരുന്നു വിഷ്ണുജയും എളങ്കൂർ സ്വദേശി പ്രഭിനും തമ്മിലുള്ള വിവാഹം. അതിന് ഭർതൃ ബന്ധുക്കൾ കൂട്ടുനിന്നതായും പരാതിയിലുണ്ട്.

വെളുത്ത നിറമില്ല, സൗന്ദര്യമില്ല, ജോലിയില്ല, നൽകിയ സ്ത്രീധനം കുറവാണ് എന്നീ ആരോപണങ്ങളാണ് പ്രഭിൻ വിഷ്ണുജക്കു നേരെ ഉന്നയിച്ചിരുന്നതെന്നും കുടുംബം പറയുന്നു.

സംഭവത്തിൽ മഞ്ചേരി പൊലീസ് അസ്വാഭാവിക മരണത്തിന് കേസെടുത്തു.