നടുവിലങ്ങാടി റോഡ് വളവിൽ വീണ്ടും അപകടം; കാറിടിച്ച് രണ്ട് ബൈക്ക് യാത്രികർക്ക് പരിക്ക്

തിരൂർ: നടുവിലങ്ങാടി പ്രധാന റോഡിലുണ്ടായ അപകടത്തിൽ രണ്ട് ബൈക്ക് യാത്രക്കാർക്ക് പരിക്ക്. തിരൂർ-താനൂർ റോഡിലെ നടുവിലങ്ങാടി വളവിലാണ് അശ്രദ്ധയിൽ കാറോടിച്ചുണ്ടായ അപകടത്തിൽ രണ്ട് ബൈക്കിലെ യാത്രക്കാർക്ക് പരിക്കേറ്റത്. തിങ്കളാഴ്ച വൈകീട്ട് 3.30 ഓടെയാണ് അപകടം. അപകടത്തിൽ തലക്കും കാലിനും പരിക്കേറ്റ ബൈക്ക് യാത്രക്കാരൻ നടുവിലങ്ങാടി സ്വദേശി സൈഫുവിനെ വളാഞ്ചേരി നടക്കാവിൽ ആശുപത്രിയിൽ പ്രവേശിപ്പിച്ചു.

മറ്റൊരു ബൈക്ക് യാത്രക്കാരനായ പൂക്കയിൽ സ്വദേശി സാജിദിനെയും ആശുപത്രിയിൽ പ്രവേശിപ്പിച്ചിട്ടുണ്ട്. തിരൂരിൽനിന്ന് താനൂർ ഭാഗത്തേക്ക് പോവുകയായിരുന്ന കാറാണ് നടുവിലങ്ങാടി വളവിൽ തിരൂരിലേക്ക് പോവുകയായിരുന്ന രണ്ട് ബൈക്കിലേക്ക് ഇടിച്ചുകയറിയത്. തിരൂർ പൊലീസ് സംഭവസ്ഥലത്തെത്തി.